Bokstan Qazaqstan ulttyq quramasynyń bas bapkeri Myrzaǵali Aitjanov Indoneziiada ótken Aziia oiyndarynyń qorytyndysy boiynsha óz pikirin bildirdi, dep habarlaidy QazAqparat.
«Ulttyq quramanyń basy-qasynda júrgennen keiin, sportshylardyń qandai jaǵdaida ekenin bárin bilemin. Jigitterimiz óte jaqsy daiyndaldy. Qansha ter tógildi, biraq eńbek aqtalmady. Bunyń kóp sebepteri bar. Sol sebepterdiń kóbisi tóreshiler tarapynan boldy. Ulttyq quramanyń árbir múshesi, iaǵni jeti salmaqtyń barlyǵy jaqsy daiyndyqpen bardy. Mysaly, 2014 jyly Aziia oiyndarynda bizdiń ulttyq qurama alty altyn medal aldy. Ádil tóreshiler bolǵanda únemi bokstan bes altyn medaldan kem alǵan emespiz», - dep toqtaldy M. Aitjanov.
Onyń sózine qaraǵanda, Aziia oiyndaryna Qazaqstan boksshylary kem degende 2 altyn medal alý josparymen barǵan.
«Biz qansha tyrysqanymyzben, aiaqtan shalatyn adamdar boldy. Bul jaǵdai birinshi kúnnen bastap kórindi. Osyndai keleńsiz jaǵdailarǵa moiymai, alǵa jyljý kerek», - dedi bas bapker.
Aita keteiik, Aziada finalynda judyryqtasqan Aslanbek Shymbergenov (69 keli) pen Ábilhan Amanqul (75 keli) tóreshiler sheshimimen jeńilis tapty. Kópshilik mamandar men jankúierler qazaq boksshylaryna qiianat jasalǵanyn aitýda. Eki boksshy da finalda altynǵa laiyqty óner kórsetken bolatyn.
Eske salsaq, Aziia oiyndarynda Qazaqstan quramasy 15 altyn, 17 kúmis jáne 44 qola medal alyp (barlyq medaldar sany - 76), jalpy reitingte toǵyzynshy orynnan kóringen bolatyn.
