Foto: elements.envato.com
1 qazannan keiin 2021 jylǵa jeke múlik salyǵyn tóleý merzimi aiaqtalady. Osyǵan bailanysty 65 myńnan asa almatylyq bank qyzmetterinen aiyrylýy múmkin, - dep habarlaidy Tengrinews.kz agenttigi qalalyq Memlekettik kirister departamentine silteme jasap.
Vedomstvo málimetinshe, salyq tólemegen azamattardyń bank shottaryn ashyp, aqsha aýdaryp, nesie alý jáne t.b. múmkindigi bolmaidy. Munyń bári salyq zańnamasynda jazylǵan.
"Menshiginde jeke úileri, páterleri, saiajailary, garajdary jáne basqa da ǵimarattary bar tulǵalar salyq tóleýshi bolyp sanaldy. Tóleý merzimine sanaýly kúnder qalǵanyna qaramastan, 65 215 turǵyn jalpy somasy 945 million teńge salyq tólemegen. Tólenbegen salyqtyń kóp bóligi Bostandyq aýdanynyń turǵyndaryna tiesili – shamamen 15 million teńge", - dedi Almaty MKD ókilderi.
Tólem merzimi ótken árbir kún úshin Ulttyq bank belgilegen resmi stavkanyń 1,25 eselengen mólsherinde ósimpul esepteledi.
"Salyq organdary májbúrlep óndirip alý maqsatynda sot oryndaýshylaryna salyqtyq buiryqtardy jiberedi, olar boryshkerlerge qatysty sharalardy, onyń ishinde múlik pen bank shottaryna tyiym salýdy, sondai-aq elden tys jerlerge shyǵýdy shekteýdi qoldanady. Sonymen qatar, qaryz somasynyń 25 paiyzyn quraityn sot shyǵyndary ustalady.
Salyqtardy tólemeýge bailanysty jaǵymsyz jaǵdailardy boldyrmaý úshin jaqyn kúnderi jeke tulǵalardyń múlik salyǵyn tóleýge shaqyramyz. Barlyq suraq boiynsha biryńǵai bailanys ortalyǵyna 1414 nómiri boiynsha habarlasýǵa bolady" ,- dep tolyqtyrdy departament ókilderi.
Eske salaiyq, buǵan deiin Memlekettik kirister komiteti 1,7 millionǵa jýyq qazaqstandyq 5,7 milliard teńge kóleminde múlik salyǵyn tólemegenin habarlaǵan bolatyn.
