© Sputnik / Vladislav Vodnev
Májilistiń kezekti otyrysyna zań jobasy boiynsha baiandama jasap, suraqtarǵa jaýap berýge kelgen ministrler men vitse-ministrler depýtattardan sóz estip qaitty, dep habarlaidy Sputnik Qazaqstan.
Úkimet músheleri arasynan minberge alǵashqy bolyp ulttyq ekonomika ministri Álibek Qýantyrov shyqty. Ol iri qalalarǵa irgeles eldi mekenderdiń máselesin sheshýdi kózdeitin zań jobasy boiynsha baiandama jasady. Sodan keiin depýtattardyń suraqtaryna jaýap berdi.
© Sputnik / Vladislav Vodnev
Alaida qandai saýal qoiylmasyn, ministrdiń jaýaby májilismenderdi qanaǵattandyrmady. Depýtattar naqty jaýap ala almaǵanyn aityp shaǵymdandy. Depýtat Edil Jańbyrshin sheneýnikti, tipti synap tastady.
"Biz ministrdiń jaýaptarynan naqty eshteńe estigen joqpyz. Absoliýtno. Túk túsiniksiz", - dep ashýlandy Jańbyrshin.
Tómengi palata depýtattarynyń kóńilin qaldyrǵan úkimettiń taǵy bir ókili tótenshe jaǵdailar vitse-ministri Marat Kúldikov boldy. Ol parlamentke Qazaqstan men Ózbekstan úkimetteri arasyndaǵy tótenshe jaǵdailar týraly kelisimdi ratifikatsiialaý jónindegi zań jobasy jaily baiandaýǵa kelgen.
© Photo: primeminister.kz
Sheneýnik kómekshileri daiyndap bergen qazaqsha baiandamany esh qiyndyqsyz oqyp bergenimen, suraq-jaýap kezinde tosylyp qaldy. Sóitsek, vitse-ministr qazaq tiline shorqaq eken. Onyń ústine, qoiylǵan saýaldarǵa da tushymdy jaýap bere almady. Tómengi palata depýtaty Erlan Saiyrov suraq qoimas buryn ministrlik ókiline eskertý jasady.
"Birinshiden, meniń oiymsha, ministrlik ókilderi májiliske durystap daiyndalyp kelýi kerek. Májilis degenimiz parlament institýty. Bul jerge kelgen azamattar depýtattarda qandai suraqtar bar, sonyń anyq-qanyǵyna jetip, yqtimal saýaldarǵa daiyndalyp kelýge tiis. Shynyn aitý kerek, mynaý uiat endi", - dep ashyndy Saiyrov.
© Sputnik / Bolat Shaihinov
