Májilis tóraǵasy Nurlan Nyǵmatýlin Qazaqstannyń tarihi-mádeni muralarynyń biryńǵai keshenin jasaý tujyrymdamasyn ázirleýge biýdjetten 100 million teńge suraǵan Mádeniet jáne sport ministrligin qatań synǵa aldy, dep habarlaidy Sputnik Qazaqstan.
Búgin Májiliste "2019-2021 jyldarǵa arnalǵan respýblikalyq biýdjet týraly" zańǵa ózgerister engizý týraly" zań jobasy qaraldy.
Depýtat Beibit Mamyraevtyń aitýynsha, qujatta Qazaqstannyń tarihi-mádeni murasynyń biryńǵai keshenderin jasaý tujyrymdamasyn ázirleýge arnalǵan shyǵystar 100 million teńgege ulǵaitylǵan. Májilismender bul biýdjet qarajatyn tiimsiz jumsaý dep sanaidy.
"Bizdiń oiymyzsha, Qazaqstanyń tarihi-mádeni murasynyń biryńǵai keshenderin jasaý qazirgi tarihi-mádeni mura obektilerin biryńǵai bazaǵa jinaqtaýdy bildiredi. Bul jaily aqparat internette jetip artylady. Olardy tek sapaly júieleý kerek. Osyǵan shyn máninde 100 million teńge kerek pe? Jyl sońy da taqap qaldy, áli konkýrs ótkizip, bul jumysty oryndaý kerek. Ministrliktiń biýdjet shyǵystaryn ońtailandyrýǵa osylai qaraǵany bizge túsiniksiz?", - dedi Mamyraev.
Mádeniet jáne sport ministriniń mindetin atqarýshy Eldos Ramazanov kontseptsiia tórt baǵyttan turatynyn, tarihi eskertkishter men olardyń infraqurylymyn damytýdyń bas jospary ekenin atap ótti.
Alaida, Májilis tóraǵasy Nurlan Nyǵmatýlin Ramazanovtyń jaýabyna qanaǵattanbady. Spiker bildei bir ministrlikten tujyrymdamany ázirleitin toptyń shyqpaǵanyna qynjyldy.
"Árine, biz mádeni murany saqtaýymyz kerek. Qarajat bóliný kerek. Oǵan daýymyz joq. Eldos Muratuly, sizdiń ministrlikte apparat bar ǵoi, bar. Sol apparatta myqty mamandar bar ma?", - dep surady ol sheneýnikten.
Ramazanov "biraz bar" dep qysqa qaiyrdy.
"Siz ózińizdi qai topqa jatqyzasyz. Aityńyzshy. Jaraidy, birinshi topta bolsyn", - dep kúldi spiker.
"Joq, ortashamyz ǵoi endi", - dedi Ramazanov.
"Mekemege jumysqa turarda, túiindeme jazǵan kezde masqara endi. Tórt-bes diplomdaryńyz bar, birneshe jerden taǵylymdamadan ótken. Al jaýap bergen kezde "ortashamyn" deisizder. Meniń bilýimshe, mádeniet ministrliginiń apparatynda 300-dei adam qyzmet etedi. Budan bólek, murajailar, mádeni ortalyqtar bar. Olardyń barlyǵynda qanshama maman jumys isteidi. Osylardyń ishinen baǵdarlama emes, kontseptsiia jasaityn bir top shyqpasa, onda osynsha qyzmetkerler ne úshin kerek? Ne úshin olardy ustaimyz?", - dep ashýlandy Nyǵmatýlin.
Spikerdiń sózine sensek, ministrlik 100 million teńgeni kontseptsiia ázirleitin topty jaldaý úshin suraǵan eken.
"Olar bizge jazyp beredi deidi. Mynaý masqara ǵoi. Sonda ministrliktiń apparaty nemen ainalysady? Bizdegi barlyq memlekettik organda osyndai. 100 millionǵa jekemenshik kompaniiany jaldaisyńdar. Sodan keiin olardyń jazǵanyn Úkimet pen Parlamentte tanystyryp, óz eńbekteriń siiaqty maqtanasyńdar. Memleket nege artyq aqsha jumsaýy kerek?! Men osyny túsinbeimin", - dedi Májilis tóraǵasy.
Onyń aitýynsha, memlekettiń aqshasyna naryqtaǵy kompaniiany jaldap, jazdyra salý – eń ońai jol.
"Qudai biledi, olardyń ne jazatynyn?!.. Biz memlekettiń aqshasyn ońdy-soldy shashpai, tiimdi jumsaý kerek dep sanaimyz. Ony ár ministr, memlekettik organnyń basshysy bilip júrýi kerek. Jumys istegende osyny esten shyǵarmaiyq", - dep túiindedi sózin Nyǵmatýlin.
