Foto: Freepik
Qyzylordada jasóspirim qyzdy jezókshelikke tartý isi boiynsha jańa sheshim qabyldandy. Oqiǵa qoǵamda keń talqylanyp, kópshiliktiń nazaryn aýdarǵan edi. Soǵan bailanysty jábirlenýshiniń anasy ákimshilik jaýapkershilikke tartyldy, dep habarlaidy Ult.kz POLITICO.KZ saityna silteme jasap.
Qyzylorda oblysynyń kámeletke tolmaǵandardyń isteri jónindegi mamandandyrylǵan aýdanaralyq soty bul isti qarap, jábirlenýshiniń anasynyń óz mindetterin tiisinshe oryndamaǵanyn anyqtady. Sottyń habarlaýynsha, ol Ákimshilik quqyq buzýshylyq týraly kodekstiń 127-babynyń 1-bóligi boiynsha, iaǵni kámeletke tolmaǵandy tárbieleý, bilim berý jáne onyń quqyqtary men qaýipsizdigin qamtamasyz etý jónindegi mindetterdi oryndamaý babymen jaýapqa tartyldy.
Sot sheshimimen áielge aiyppul salyndy. Sonymen qatar, zańnamaǵa sáikes aiyppul kólemi 30 paiyzǵa azaitylyp, 7 ailyq eseptik kórsetkish (27 524 teńge) mólsherinde belgilendi. Alaida qaýly áli zańdy kúshine engen joq.
Bul is qoǵamda úlken rezonans týǵyzǵan bolatyn. Sebebi, tergeý barysynda 16 jastaǵy oqýshy qyzdyń synyptastary ony birneshe ai boiy jezókshelikpen ainalysýǵa májbúrlegeni anyqtalǵan. Qazirgi ýaqytta qylmystyq is boiynsha tergeý jalǵasyp jatyr, al quqyq qorǵaý organdary jábirlenýshiniń qaýipsizdigin qamtamasyz etý baǵytynda tiisti sharalar qabyldaýda.
