- «BTA Banki» AQ basqarmasy basshysynyń burynǵy orynbasary Jaqsylyq Jarymbetov elge oraldy. Onyń oiynsha, búginde shetelde júrgen Muxtar Ábiliazov saiasatty jamylyp, bilikke talasýdy kózdeidi, dep xabarlaidy Ult.kz tilshisi QazAqparat agenttigine silteme jasap.
«Men ózim saiasatpen ainalysqan emespin. Endi, qatardaǵy azamat retinde saiasi jańalyqtardy oqyp júresiń ǵoi. Degenmen, birde-bir partiianyń músheliginde bolǵan joqpyn. Men ózim - qazaqi ortadan shyqqan adammyn. Qazaq mektebin bitirdim. Sondyqtan týǵan jerim ylǵi tartyp turady. Al Ábiliazov myrzada ondai qasiet joq de oilaimyn. Menińshe, ol - kosmopolit, bir nárseni istese, jeke múddesin kózdeidi. Sonyń ishinde bank te, sondaǵy menedjerler men qyzmetkerler onyń qolynda belgili bir maqsatqa jetýdiń quraly ǵana boldy. Adam bilikti ańsasa, ne aitýǵa bolady? Onyń ustanymy sondai, kózqarasy sondai. Oǵan qarsy men ne istei alamyn? Óz basym meniń isime saiasattyń eshbir qatysy joq de oilaimyn», - deidi Jarymbetov.
Aita keteiik, búgin Jarymbetov arnaiy baspasóz máslixatyn ótkizip, ózine qatysty taralyp jatqan alyp-qashpa áńgimelerdi joqqa shyǵardy.
Onyń sózine qaraǵanda, qańtardyń 17-si kúni Túrkiianyń shekara qyzmeti ony jalǵan tólqujatpen júrgeni úshin ustaǵan bolatyn. «Politsiia ýchaskesinde otyrǵanda men ózimniń shyn aty-jónimdi aittym. Sosyn Ystanbuldaǵy Qazaqstannyń resmi ókildiligine xabarlasýdy ótindim. Sóitip, qańtardyń 20-sy kúni meni Qazaqstanǵa ekstraditsiialady. Ertesinde meni tergeý abaqtysyna qamady. Osy ýaqytqa deiin sonda boldym. Maǵan eshqandai zorlyq-zombylyq pen qysymnyń jasalmaǵanyn málimdegim kelip otyr», - deidi ol.
Onyń sózine qaraǵanda, osydan 8 jyl buryn bastalǵan qylmystyq is kezinde úrei-qorqynysh boldy. Sol sebepti Jarymbetov birden boi tasalap ketti. Al Ábiliazov úshin onyń elge oralǵany tiimsiz boldy.
