QR Mádeniet jáne sport ministri Arystanbek Muxamediulynyń aitýynsha, búginde elimizde shet el azamattary úshin vizany elektrondy túrde alý júiesin engizý máselesi talqylanyp jatyr. Sebebi týristerdiń kóbisi Qazaqstanǵa kelgisi keledi. Alaida viza alý kezinde san alýan qiynshylyqtarǵa tap bolatyny jaiynda jii aitady, dep xabarlaidy QazAqparat tilshisi.
«Jaqynda biz shekara qyzmetimen (QR Ulttyq qaýipsizdik komitetiniń qurylymy - avt.) kezdesip, elektrondy vizaǵa kóshý máselesin talqylaǵan edik. Aldaǵy ýaqytta «Tsifrlyq Qazaqstan» memlekettik baǵdarlamasy aiasynda osy máseleni sheshetin bolamyz. Shyny kerek, bizdiń qazirgi viza berý júiemiz óte kúrdeli ári qatań. Eń qyzyǵy, bári ony ulttyq qaýipsizdikpen túsindiredi. Men aitamyn, barlyq álem týrizm arqyly investitsiiany tartýdy oilaidy, jalǵyz qazaq qana ulttyq qaýipsizdigin oilap otyr. Shyn máninde, viza berý máselesin jeńildetý kerek», - dedi Muxamediuly búgin otandyq týrizmdi damytý máselelerine arnalǵan jiynda.
Ministrdiń aitýynsha, aldaǵy ýaqytta Qazaqstan arqyly tranzitpen ótetin Iran men Úndistan azamattary úshin 72 saǵatqa deiingi vizasyz rejimdi engizý josparlanyp otyr. «Menińshe, aldaǵy eki aptanyń ishinde osy másele sheshiledi», - dep atap kórsetti Muxamediuly.
Aita keteiik, búginde 72 saǵatqa deiingi vizasyz rejim Qytai azamattary úshin engizilgen. Atalǵan bastama EKSPO kórmesi aiasynda pilottyq joba retinde qolǵa alynyp otyr. Oǵan sáikes, Astana men Almaty áýejailary arqyly basqa elderge ushyp bara jatqan qytailyq týrister Qazaqstanda úsh kún boiy vizasyz júre alady.
