QR Mádeniet jáne sport ministri Arystanbek Muxamediuly Býrabai kýrortynda álemdik mańyzy bar sharalardy ótkizýge qatysty pikir bildirdi, dep xabarlaidy QazAqparat tilshisi.
«Ókinishke qarai, Býrabaida álemdik deńgeidegi mádeni nysandar joq. Negizi, qazirgi kezde aýqymdy qoǵamdyq sharalar arqyly týristerdi kóptep tartý tájiribesi keńinen taraǵan. Máselen, álemdik oiyn-saýyq ortalyǵyna ainalǵan Las-Vegasta milliardtaǵan týristerdi mádeni sharalar arqyly tartady. Los-Anjeleste ornalasqan «Memorial Kolizeým» stadionynda eki birdei Olimpiada ótti. Budan bólek, álemge tanymal juldyzdardyń kontsertteri ótip turady. Sol siiaqty Toronto qalasyndaǵy Eir Kanada ortalyǵynda jyl saiyn 200-den astam shara uiymdastyrylady. Sonyń arqasynda on jyldyń ishinde 2,5 mlrd dollar paida tústi. Bizdegi «Býrabai Kongress ortalyǵy» týra sondai kópfýnktsionaldy mádeni-saýyq ortalyǵyna ainalady degen senim bar. Ol jerde álemdik mańyzy bar sharalardy ótkizýge barlyq jaǵdai jasalady», - dedi A.Muxamediuly búgin Shýchinsk-Býrabai kýrorttyq aimaǵyn damytý máselelerine arnalǵan jiynda.
Ministrdiń aitýynsha, Býrabaida xalyqaralyq sharalardy ótkizý arqyly týristerdi kóptep tartýǵa bolady.
«Biyl jazda alǵash ret Halyqaralyq balalar festivalin ótkizeiin dep jatyrmyz. Ondai sharalar Ispaniia, Túrkiia jáne taǵy basqa memleketterde jii uiymdastyrylady. Nege deseńiz, bir balamen birge mindetti túrde bes-alty adam keledi. Ol - áke-sheshesi, ustazy, dostary jáne taǵysyn taǵylar. Osylaisha, ishki týrizmdi damytýǵa múmkindik bar. Sol sebepti biylǵy festivaldi Astanamen qatar Býrabaida ótkizgendi jón kórdik», - dep atap kórsetti A.Muxamediuly.
