Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin sheteldik IT-kompaniialardy «Astana hub» tehnoparkine shaqyrdy, dep habarlaidy "Ult aqparat".
«Astana hub» halyqaralyq startaptar tehnoparkine sheteldik kompaniialardyń relokatsiiasy boiynsha biraz suraqtar túsýde. Bizge kórshi elderden IT-mamandar kelip jatqanyna da birneshe jyl boldy. Sondai kompaniialardyń biri - inDriver. Qyzmetin qazaqstandyqtar da paidalanatyn osyndai komandanyń kelgenine biz qýanyshtymyz. Aita ketý kerek, Astana_hub áýel bastan halyqaralyq tehnopark retinde qurylǵan. Álemdik deńgeidegi kompaniialar men mamandarǵa múmkindik berý arqyly biz ózimizge de tiimdi jaǵdai qalyptastyramyz: sheteldik mamandarmen tájiribe almasý jáne qazaqstandyqtar úshin jumys ornyn kóbeitý», - dep jazdy ministr óziniń Facebook paraqshasynda.
Búgingi tańda habta 641 IT-kompaniia tirkelgen, onyń 70-i sheteldik quryltaishylar. Qazir jaqyn sheteldiń 468 kompaniiasy Qazaqstanǵa relokatsiia boiynsha keńes alyp jatyr.
Sonymen birge Baǵdat Mýsin sheteldik kompaniialar úshin Astana habty, iaǵni Qazaqstandy tańdaý nelikten tiimdi ekenin túsindirdi.
«Bul rette tehnoparkte qandai jaǵdai jasalǵanyn qysqasha aityp óteiin: Arnaiy salyq tártibi – habta tirkelgen kompaniialar salyq tólemeidi, korporativtik salyq - 0%. IT-kompaniialarǵa mundai jeńildik 4 jyl buryn jasalǵan. Kórshi elder mundai jeńildikti jýyrda ǵana engizdi, al keibir elder endi ǵana josparlap jatyr. Ekinshisi – zamanaýi infraqurylym. 20 myń sharshy metrdi arzan baǵamen paidalanýǵa bolady. Bul ofister ǵana emes, kezdesý oryndary, breinstorming men timbilding ótkizetin jerler. Onyń ústine, startaptar – tehnopark baǵdarlamalarynyń rezidentteri habta jumys alańdaryn tegin paidalana alady. Úshinshisi – vizalyq qoldaý. Bizdiń IT-habta tirkelgen kompaniialardyń jumysshylary úshin viza alý men migratsiialyq protsester jeńildetilgen. Biz tek tirkelý protsesine ǵana emes, relokatsiia máselesinde de, iaǵni qyzmetkerlerdi kóshirý, úi-jai tabý boiynsha uiymdastyrý jumystaryna da kómektesip jatyrmyz. Al EAEO elderiniń IT-mamandaryna eshteńe rásimdeýdiń de qajeti joq, birden kelip, jumys istei berýge bolady. Tek JSN alý kerek, onlain jasaýǵa bolady nemese bizdiń mamandar kómektesedi», - dedi ol.
Sonymen birge SEED stage kezeńinde venchýrlyq qarjylandyrý qarastyrylǵan. Habtyń ózi startaptyń bastama kezeńinde 40 myń dollarǵa deiin salady.
«Venchýrlyq qarjyǵa qoljetimdilik bolmasa, bizdiń indýstriiadaǵy hab degenniń máni bolmaidy. Investitsiia quiýǵa turarlyq startaptardy tabý maqsatynda túrli is-sharalardy jii ótkizemiz. Bizdiń seriktesimiz VC jyl saiyn qyzyqty startaptarǵa 100 mln dollarǵa deiin bólýge daiyn. Odan bólek, akseleratsiia kýrstaryna tegin qatysýǵa bolady. Barlyq komandalar akseleratsiia boiynsha kýrstardan ótken. Biznesin damytqysy keletin jas startaperlerge álemniń kásibi mentorlary keńes berip, oqytyp, baǵyt-baǵdar silteidi. Memleket tarapynan jekemenshik innovatsiialyq IT-mektepterge suranys bar. Iaǵni IT-mamandyǵyn igergisi keletin kez-kelgen adam TechOrda baǵdarlamasy boiynsha IT-vaýcherge qol jetkize alady. Jáne IT-vaýcher kez-kelgen IT-mektepte jaramdy», - deidi Mýsin.
Sondai-aq elge kelmei-aq, eGOV arqyly zańdy tulǵany tirkeýge bolady. JSN men ETsQ-ny Qazaqstan elshiligi beredi.
«Qazaqstanda IT-biznesti iske qosý jáne relokatsiia máseleleri boiynsha telegramda arnaiy chat ashtyq – https://t.me/+uwNsTKMdI7oyZTUy. 3 myńnan astam qatysýshysy bar chatta habtaǵy áriptesterimmen birge túrli saýaldarǵa jaýap berip jatyr. Qazaqstan – júzden astam ult pen ulys turyp jatqan qonaqjai el. Bizdiń eldiń igiligi úshin eńbektenip, damýyna úles qosatyn kisilerge esigimiz ashyq. Bizdiń elde eńbektenip, zańdy tulǵa ashqysy keletinder úshin Astana habtyń mamandary arnaiy nusqaýlyq ázirledi», - dep jazdy Tsifrlyq damý ministri.
