QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin eldegi tsifrlandyrýdy arttyrýǵa qatysty bes bastamany aityp berdi, dep habarlaidy QazAqparat.
«Árine, aqparattyq qaýipsizdik boiynsha turǵyndarda úlken suraq týyndaidy. Pandemiia kezinde báriniń internetke kirgeni túsinikti. Munda belgili bir sharalardy atqarýǵa mindettimiz. Sondyqtan jaqynda qurylǵan aqparattyq qaýipsizdik komiteti bes baǵytty usynyp otyr. Onyń birinshisi, qazaqstandyq internet-keńistiktegi 150 myń domendik ataý bar jáne osy 150 myń domenniń barlyǵy belgili bir qorǵaýda bolýy úshin komitetke júginýge quqyly. Arnaiy veb-totem qosymshasyn ornatylady jáne qandai da bir aqaý anyqtalsa, sait iesine habarlanady», - dedi ministr Ortalyq kommýnikatsiialar qyzmetinde ótken brifingte.
Sonymen birge, turǵyndardy memlekettik organdardyń jeke derekterdi paidalanǵany týraly habardar etý servisin de engizý josparlanǵan.
«2010 jyldary halyqqa qyzmet kórsetý ortalyqtary qarqyn alyp, derekter bazasynan anyqtamalar alynǵanda HQKO operatorlary osy qoljetimdilikti paidalanyp, adamdardyń jeke aqparatyn kóre alady degen kúdikke ilindi. Bul máseleni sheshý úshin ár adamnyń aqparatyn suratý faktileri elektrondy úkimettegi jeke kabinette kórsetilip otyrdy. Endi dál osyndai qaǵida basqa memlekettik organdarǵa da qatysty bolady», - dep túsindirdi B. Mýsin.
Sondai-aq, ministrlik qazaqstandyqtarǵa internettegi ózi týraly aqparatty óshirý múmkindigin berýdi usynady. Qazirdiń ózinde komitet internettegi aqparatty óshirý boiynsha birneshe ótinishti maquldaǵan.
Al tórtinshi usynys – derekter bazasyndaǵy jeke málimetterdi qoldanýǵa ruqsat berýmen bailanysty.
«Qazir bankten nesie alǵanda siz ózińiz týraly aqparatty paidalanýǵa kelisim beresiz. Biraq, nesie ótelgen soń bankpen qarym-qatynasyńyz úziledi. Biraq bank nemese birinshi kredittik biýro nemese memlekettik kredittik biýro qandai da bir algoritmderdi qurý úshin sizdiń aqparatyńyzdy alýǵa quqyly. Munyń bári jeke málimetter. Sondyqtan biz adamdarǵa jeke derekterdi paidalaný kelisimderin qaitaryp alý múmkindigin bergimiz keledi», - deidi ministr.
Sóz sońynda ministr aqparattyq júielerdegi, onyń ishinde memlekettik organdardyń aqparattyq júielerindegi kemshilikti tapqan qazaqstandyqtarǵa syiaqy taǵaiyndaýdy usyndy.
