Qazaq ulttyq óner ýniversitetiniń rektory Aiman Musaqojaevanyń aitýynsha, úshinshi kýrsta oqityn Dimash Qudaibergen AQSh-tyń Los-Andjeles qalasyna oqýǵa barýy múmkin, dep habarlaidy QazAqparat tilshisi.
«Qazirgi kezde biz akademiialyq utqyrlyq baǵdarlamasy aiasynda AQSh-tyń Los-Andjeles qalasyndaǵy Musicians institute (Sollege of ContemporaryMusic) mekemesimen Dimash Kudaibergendi oqýǵa qabyldaý boiynsha kelissózder júrgizip jatyrmyz. Oqýdyń merzimi - 120 kún», - dedi Musaqojaeva QazAqparat tilshisine bergen suhbatynda.
Onyń aitýynsha, Dimashtyń daýysy erekshe, san alýan janrdaǵy shyǵarmany oryndai alady. Onyń anasy joǵary sopranony sheber oryndasa, ákesi - lirikalyq tenor. Dimashtyń ózi Ahmet Jubanov atyndaǵy Aqtóbe mýzykalyq kolledjinde bilim alǵan. Al 2014 jyly Qazaq ulttyq óner ýniversitetine tústi. Qazirgi kezde ol «Estrada óneri» kafedrasynyń 3-kýrsynda oqidy.
Aita keteiik, 2010 jyly Dimash Qudaibergen «Baiqońyrdyń jarqyn daýystary» halyqaralyq festivalinde birinshi oryndy ielengen. Al araǵa eki jyl salyp, «Jas qanat» respýblikalyq baiqaýynda top jardy. Sol jyly «Shyǵys bazary» halyqaralyq konkýrsynda taǵy da bas júldeni qanjyǵasyna bailady. 2015 jyly «Slavian bazarynda» Gran-pri iegeri atandy.
Qazirgi kezde Dimash Qudaibergen Qytaidyń Hýnan qalasynda ótip jatqan «I am a singer» halyqaralyq baiqaýyna qatysyp jatyr. Baiqaýdyń 5-kezeńinde ol «Uptown Funk» ánimen besinshi oryndy ielendi. Onyń qytailyq jankúierleri ánshige arnap qumnan ádemi beine salýǵa qatysty videorolik túsirdi. Bir aptaǵa jetpeitin ýaqyt ishinde ony 5 mln-nan astam adam kórip shyqty.
