Parlament Senatynyń depýtaty Murat Baqtiiaruly QR Prezidenti Qasym-Jomart Toqaevtyń «Egemen Qazaqstan» gazetinde jariialanǵan «Táýelsizdik bárinen qymbat» atty maqalasyna qatysty pikir bildirdi, dep habarlaidy "Ult aqparat".
«Qazaqstan Respýblikasynyń Prezidenti Qasym-Jomart Kemeluly Toqaev biylǵy 5-shi qańtary kúngi Egemen Qazaqstan gazetinde osy jyly elimizdiń táýelsizdigine 30 jyl tolatyndyǵyn jáne tarihtyń osy bir asa qysqa merziminde qandai tarihi jetistikter men tabystarǵa qol jetkizgendigimiz jaily jan-jaqty baiandap berdi. Prezidentimiz aityp otyrǵanyndai, biz úshin Táýelsizdik bárinen de qymbat ekendigin árbir qazaqstandyq jete sezine bilýge tiisti. Táýelsizdik jyldary qol jetkizgen tabystarymyzdy da eshkim joqqa shyǵara almaidy. Biz endigi arada Táýelsiz Qazaqstannyń otyz jylda qol jetkizgen tabystaryn baiandy ete otyryp, el egemendigin odan ári nyǵaitýǵa mindettimiz. Qazir álem boiynsha pandemiia indetiniń taralýyna bailanysty áleýmettik jáne ekonomikalyq salada kúrdeli jaǵdai qalyptasyp otyrǵany belgili. Indettiń zardaptary bizdiń elimizdi de ainalyp ótpegendigi anyq», - dedi senator.
Sonymen qatar M. Baqtiiaruly Qazaqstandy birtutas memeleket retinde álem moiyndanyn eske saldy.
«Prezidentimizdiń maqalasynda qasietti qazaq jeri – eń basty bailyǵymyz dep atap kórsetilgen. Endigi arada jerimizdiń tutastyǵyna kúmán keltirýdiń qajeti joq jáne bul oraida syrtqy arandatýshylardyń áreketterine ermei, ejelgi kórshilerimizben yntymaǵymyzdy, birligimizdi joǵaltpaý qajettigi aitylady. Qazaqstan birtutas memelket ekendigin álem moiyndaǵaly qashan!
Memleket basshysy óziniń osy maqalasynda ulttyq múddeniń táýelsizdiktiń altyn arqaýy ekendigine basa nazar aýdaryp otyr. Bul oraida, memlekettik tildiń elimizdiń basty nyshandarynyń biri ekendigi retinde qarastyrylýy ábden oryndy. Sondyqtan da, Qazaqstannyń memlekettik tili – qazaq tili ekendigine basa nazar aýdarylyp, bul tildi búkil halqymyzdy biriktirýshi kúshke ainaldyrý qajettigi óte jaqsy aitylypty. Endigi másele ózimizde ekeni aqiqat. Ár qazaq balasy eń áýeli óziniń ana tiline ózi qamqor bolýǵa tiisti. Ósip kele jatqan urpaǵymyzdy óz tilinde tárbieleý ár ata-ananyń ult aldyndaǵy paryzy bolsa kerek», - dedi depýtat.
«Sonymen birge, Prezident Qazaqstannyń árbir azamatynyń memlekettik tildi bilýi paryz, mindet ekendigin atap kórsetip, qazaq tilin meńgere almai júrgenderge úndeý tastaidy. «Eshten kesh jaqsy» degen halyq danalyǵy alǵa tartylyp, memlekettik tildi úirenýge eń bastysy ynta kerektigi aitylady.
Qazaq halqy qai zamanda bolmasyn ózge ulystarmen tatý birlikte ómir súre bilgen. Eshkimdi jatsynǵan joq. Bul tarihi aqiqat. Memleket basshysy osy jaily aita otyryp, eldegi turaqtylyq pen bereke, birlik úshin bárimizdiń jaýapty ekendigimizdi durys aitqan. Biz qashan bolsyn halqymyzdy biriktiretin ortaq qundylyqtardy dáriptep, sony oi sanaǵa berik ornyqtyrý jóninde aitylǵan oidy quptaimyn.
Táýelsizdigimizdiń altyn arqaýy jáne basty qundylyǵy ulttyq múdde ekendigine Memleket basshysy óz maqalasynda keńinen toqtalady. Biz ulttyq múdde men táýelsizdikti bárinen biik qoiamyz. Halqymyzdyń bar jaqsy qasietteri, ulttyq múddesi tek qana Táýelsiz eldiń jaǵdaiynda ǵana damyp, órisin keńeite túsetindigin umytpaiyq», - dedi Murat Baqtiiaruly.
