Ulttyq qoǵamdyq senim keńesiniń múshesi Murat Ábenov Prezidenttiń ekologiialyq máselelerge bailanysty júktegen tapsyrmalaryna qoldaý bildirdi. Sarapshynyń aitýynsha qoqys óńdeýmen ainalysatyn kásiporyndardy qazir barynsha yntalandyrý kerek, dep habarlaidy QazAqparat.
«Prezidenttiń osynaý joǵary deńgeide Ekologiia ministrligi halyq pen qoǵam belsendilerin, sarapshylardy tartyp, júieli túrde kóterip kele jatqan problemalardy aitqanyna qýanyshtymyn», - dedi Murat Ábenov.
Sarapshy osyǵan deiin eldegi ekologiialyq máseleler júieli túrde sheshimin tappai, olarǵa kommýnaldyq sharýashylyq deńgeiinde de qaralyp kelgenin de aityp ótti.
«Sebebi yntalandyratyn faktor joq. Biznes úshin de, azamattar úshin tólem birdei. Qalalardyń ainalasynda qurylys qoqystary men meditsinalyq qaldyqtar úiilip jatyr. Bul jerde qoqysty jinaý úshin ǵana emes, ony óńdeý úshin de yntalandyrýshy faktorlar bolýy tiis. Muny zańnamalyq turǵyda retteý kerek. Bul jerde depozittik júieni, qoqys jaǵatyn zaýyttardyń máselesin, qoqys óńdeitin kásiporyndardy qarjylandyrý isin zerttegen jón. Qoqyspen jumys júrgizýdiń ózi de sol kezde tabys ákelmek. Sonymen qatar qoqysty zańsyz shashatyndardyń da jaýapkershiligin kúsheitken durys. Alaida munyń bárin qadaǵalaýdyń elektrondy júiesin engizý arqyly júrgizgen abzal. Árbir kóliktiń janynda bir-bir politseiden qoia almaisyń», - deidi Murat Ábenov.
Sarapshynyń aitýyna qaraǵanda qazirgi ýaqytta qaralmai jatqan aýmaqtardyń iesi joq.
«Ásirese demalys oryndaryn, tabiǵi aýmaqtardy aityp otyrmyn. Jaqynda da Almaty mańyndaǵy Ile-Alataý ulttyq parkinde boldyq. Qoqys úiilip jatyr. Birneshe qoryqshy ol jerdi baqylaýǵa da úlgermeidi. Eger osyndai aýmaqty tazalyq pen tártipti saqtai alatyn jaýapty investorlardyń saýatty basqarýyna beretin bolsaq, ondaǵy qoqys máselesi de retteler edi», - dedi ol.
Murat Ábenovtiń aitýynsha, balalarǵa mektepte ekologiialyq bilim bermese olar eseigende qorshaǵan ortanyń qadirin bilmeidi.
«Máselen ministrlik jekelegen uiymdarmen birge mektepterde ekologiialyq saǵattardy ótkizedi. Onda oqýshylarǵa qoqysty bóle-jara salý jaǵy da oqytylady. Balalar osyndai synaq-sabaqtan ótkennen keiin bir qyzyǵy osy úirengenderin ata-anasyna da úirete bastapty. Ekologiialyq mádenietti oqytqan óte mańyzdy. Munymen ainalyspaýdyń saldary qoqystyń qordalanyp, jasy tehnologiialarǵa úreilene qaraityndai jaǵdaiǵa ákep soqty», - deidi ol.
Eske sala ketsek 10 shildede ótken Úkimettiń keńeitilgen otyrysynda Memleket basshysy Qasym-Jomart Toqaev mektep baǵdarlamasyna «Balalardyń ekologiialyq bilimi» atty jańa pán engizýdi tapsyrǵan bolatyn.
«Bizge qazirgi ýaqytta qoǵamdyq kózqaras turǵysynan mańyzy artyp kele jatqan ekologiia problemasymen ainalysý kerek. Jyl saiyn 5 mln tonnaǵa jýyq turmystyq qatty qaldyq jinalyp qalady. Olardyń 15 paiyzy ǵana óńdelýde. Bul - jetkiliksiz», - dedi Prezident.
