Senat depýtaty Gennadii Shipovskih QHA múshesi retinde Stanislav Cherchesovtiń qazaq tilin frantsýz tilimen shatastyrǵan áreketine qatysty Sport ministri men Qazaqstan fýtbol federatsiiasyna úndeý joldady.
Depýtat videoúndeýdi óziniń feisbýktegi paraqshasynda jariialady.
"Ózderińiz kórip otyrǵandai, fýtbol quramamyzdyń bas bapkeri Cherchesovtiń qazaq tiline bailanysty brifingte aitqan pikirine qatysty shý bolyp jatyr. Ol bul jerde qazaq tili men frantsýz tilin shatastyryp tur. Bul video áleýmettik jeline dúr silkindirip jatyr. Bir jaǵynan qarasańyz video ersi kórinedi", - dedi senator.
Ol videoúndeýinde Cherchesovke qazaq tili men frantsýz tiliniń aiyrmashylyǵyn túsindirdi.
"Meniń oiymsha, ol bizdiń elimizde qyzmet etip, bas quramamyzdy baptap jatqannan keiin qazaqsha bilmese de, qazaq tili men frantsýz tiliniń aiyrmashylyǵyn bilgeni durys. Sondyqtan soǵan mán berseńiz. Óitkeni qazaq tilimiz – elimizdiń basty bailyǵy. Ózge ulttyń, ózge eldiń azamaty ekenin túsinemiz. Biraq olai artyq ketýdiń qajeti joq. Federatsiianyń nemese ministrliktiń adamdary ol kisige tilge qatysty laifhaktaryn aita ketse jón bolar edi. Tilimizdi mazaq etip, ony basqa jaǵynan kórsetýdiń qajeti joq. Qazaq tili – ol frantsýz tili emes. Qazaq tili – ol dara til. Qazaq tili – ol Abaidyń tili. Qazaq tili – ol bizdiń uly tilimiz", - dep túsindirdi Shipovskih.
Depýtat elimizge kelgen ózge eldiń azamaty bolsyn, ózge ult ókili bolsyn, qazaq tiliniń mańyzdylyǵyn túsinip, bilgeni durys dep esepteitinin aitty.
"Sport ministrligi men QFF-nyń qulaǵyna altyn syrǵa. Mundai jaǵdai qaitalanbaýǵa tiis. Bizdiń til – ol basty bailyǵymyz. Tilimizdi eshkimniń eshqashan da mazaq etýge qaqysy joq", - dedi Gennadii Shipovskih.
Aita keteiik, Fýtboldan Qazaqstan quramasynyń bapkeri Stanislav Cherchesov baspasóz máslihatynda ózine qazaq tilinde suraq qoiǵan tilshige "Sen qazir frantsýz tilinde sóilep tursyń ba?" dep, mysqyldady.
