Mańǵystaý oblysy Munaily aýdanynyń «Qyzyltóbe-2» turǵyn úi massivinde sport alańy joq. Soǵan qaramastan, munailylyq jas sportshylar 60 sharshy metr ǵimaratty kásibi sport alańyna ainaldyrdy. Onda mamandar 80-nen astam balany erkin kúreske baýlyp júr. Bul týraly Munaily aýdany ákimdiginiń baspasóz qyzmeti habarlady.
«Qyzyltóbe-2» turǵyn úi massivinde sport alańdary joq. Sondyqtan ózimiz arnaiy zal ashyp, ony jabdyqtap, qyrkúiek aiynan balalardy qabyldap bastadyq. Bir baiqaǵanymyz, balalar sportqa zor yntamen keledi. Búldirshinderdiń sportqa qyzyǵýshylyǵy joǵary», - dedi jattyqtyrýshy Myńbai Izmuhanov.
Myńbai Izmuhanov sport zalyn aldymen 38 myńǵa jýyq halqy bar Basqudyq aýylynan ashqan. Keiin «Qyzyltóbe-2» turǵyn úi massivinen ǵimarat jaldap, arnaiy mamandardy jumysqa qabyldaǵan. Máselen, jattyqtyrýshy Bolatbek Hnabaev 80 balaǵa erkin kúrestiń qyr-syryn úiretip jatyr.
«Balalar sporttyq sektsiialarǵa tegin qatysady. Óitkeni qazir memleket tarapynan jeke sport klýbtaryna qatysatyn balalarǵa qarjylai kómek kórsetiledi. Sonyń esebinen kishkentai bolsa da ǵimarat jaldap, ózge jattyqtyrýshylardyń jalaqasyn berip otyrmyz», - dedi Myńbai Izmuhanov.
Sport nysanyna túske deiin 50, tústen keiin 30 bala kelip jattyǵady. 6 men 15 jas aralyǵyndaǵy balalar kóp keledi. Jas jattyqtyrýshy shákirtteriniń arasynan el chempiondary shyǵaryna bek senimdi.
Aita keteiik, budan bólek Basqudyq aýylynan da sport alańy ashyldy. Oǵan júzge jýyq bala karate jáne erkin kúres sektsiialaryna qatysady.
