«2014 jyly munai baǵasy quldyraǵannan keiin kóptegen kompaniialar paida tabý úshin jumysyn ońtailandyrdy. Al bul joly qatelesýge bolmaidy. Eger munai tasymaldaýshy nemese alýshy kompaniialar shyǵyny men investitsiiasyn qysqartatyn bolsa, bolashaq rezervinde úlken jyryq paida bolady», - dep jazady The Times basylymy.
Basylymnyń jazýynsha, ótken aptadaǵy Resei men Saýd Arabiiasynyń arasyndaǵy kelispeýshilik kesirinen OPEK+ aliansy qulap, munai alýdaǵy shekteý týraly kelisim de oryndalmaityn boldy.
«Kópshiligi benzin men basqa da janarmai baǵasynyń tómendegenine qýanýy múmkin. Degenmen, munai kompaniialaryn quqyqtyq jumystar kútip tur.
«Mundai kompaniialar qaryz ben kapital esebinen qarjylandyrylady. Munai kompaniialarynyń qaryzy túptep kelgende jer qoinaýyndaǵy qorǵa bailanysty. Al munai baǵasy quldyraǵan saiyn qordyń da azaiýynan bankter men basqa da nesielendirý oryndary qaryzdy jabýǵa kepildik bolmaitynyna alańdai bastaidy», - dep jazady avtor.
Onyń aitýynsha, 2014 jyly munai baǵasy quldyraǵan kezde kóptegen kompaniia tólem qabilettiliginen aiyryldy. Bul joly da osy oqiǵa qaitalanýy múmkin. Bul munai óndirýshilerge ǵana emes, tasymaldaý kompaniialaryna da qatysty.
«Kei kompaniialar tómen baǵamen aktiv satyp alý múmkindikterine ie bola alady. Al keibireýi qaryzdarynan qutylý úshin aktivterin satyp jiberýge májbúr bolady. Degenmen munai baǵasynyń turaqsyzdyǵynan kompaniialar qandai da bir kelisim jasaýdy ázirge toqtata turatyny anyq», - dep jazylǵan maqalada.
