Atyraý-Keńqiiaq munai qubyrynyń reversin keńeitý jobasyn iske asyrý máselesin pysyqtaý qajet. Bul týraly QR Energetika ministri Bolat Aqsholaqov aitty, dep habarlaidy QazAqparat.
«Qazaqstannyń eksportqa jáne ishki naryqqa jetkizýge arnalǵan munai tasymalynyń ártaraptandyrylǵan júiesi bar. Qazaqstandyq munaidyń eksporty Kaspii qubyr konsortsiýmynyń munai qubyry; Atyraý-Samara munai qubyry; Atasý-Alashankoý munai qubyry; Aqtaý teńiz porty; temir jolmen júzege asyrylady. Búgingi tańda munai eksporty boiynsha shekteýler joq», - dedi ol ministrliktiń keńeitilgen alqa otyrysynda.
Osy rette ministr Keńqiiaq-Atyraý munai qubyry boiynsha osy jylǵy 1 mln tonnadan 6 mln tonnaǵa deiin keri baǵytta munai aidaý jáne Batys Qazaqstan munaiyn Qazaqstan Respýblikasynyń munai óńdeý zaýyttaryna jáne Qytai Halyq Respýblikasyna eksportqa berýdi qamtamasyz etý máselelerin sheshý qajettigin aitty.
«Osyǵan bailanysty vitse-ministr Áset Maratuly Maǵaýovqa «QazTransOilmen» birlesip, Atyraý-Keńqiiaq munai qubyrynyń reversin keńeitý jobasyn iske asyrý máselesin pysyqtaýdy tapsyramyn», - dedi Bolat Aqsholaqov.
