QR munai servistik kompaniialar odaǵynyń tóraǵasy Rashit Jaqsylyqov munai baǵasynyń quldyraýy Qazaqstan ekonomikasyna qalai áser etýi múmkindigin aitty, dep habarlaidy QazAqparat.
«Munai baǵasy naryǵynda úlken tolqynys bolýdy. Munaidy iri kólemde tutynatyn Qytai memleketi koronavirýs indetine bailanysty suranysty aýqymdy mólsherde azaityp tastady. Oǵan qosa, memleketaralyq áýe qatynastaryna, sýda júzetin tankerlerge qoiylyp jatqan shekteýler de áserin tigizýde. Engizilip jatqan karantinge bailanysty avtokólikterge suranystyń azaiýy da munaiǵa degen suranysqa sózsiz keri yqpalyn tigizýde», - dedi Rashit Jaqsylyqov búgin Ortalyq kommýnikatsiialar qyzmetinde ótken baspasóz máslihatynda.
Odaq tóraǵasynyń aitýyna qaraǵanda, munai óndirýshi memleketterdiń saýda «soǵysy» naryqty shielenestirip jibergen.
«Joǵarydaǵy derekterge súiene otyryp, 2020 jyly munaiǵa degen suranystyń óte tómen bolatynyn boljaýǵa bolady. Munai baǵasynyń jaǵdaiy jaqyn arada ońalady dep aitý óte qiyn. Bizdiń boljamymyz boiynsha munaiǵa qatysty jaǵdai 1-2 jylǵa sozylýy ábden múmkin», - dedi ol.
Rashit Jaqsylyqov tek Qazaqstannyń ǵana emes, búkil dúniejúziniń ekonomikasy syn saǵatta turǵanyn aitady.
«Bizdiń memleket úshin bul jaǵdai nesimen aýyr bolady? Elimiz biýdjetiniń negizgi kirisin qamtamasyz etip otyrǵan munai jáne gaz óndirýshi mekemeler. Olardyń biýdjetke túsiretin túsimderi: ulttyq qorǵa quiylatyn transfer 3,4 trln teńge, satylǵan ónimge salynatyn baj kirisi – 1 trln teńge. Eger munai baǵasy 25 dollarǵa tússe bajdyq alym tólenbeidi. Munaiǵa qyzmet kórsetý salasynyń biýdjetke berip otyrǵan qarjysy – 500 mlrd teńgeni quraidy. Munai baǵasy búgingi kórsetkishte qala beretin bolsa, kiris úsh ese azaiady. Biýdjettiń ishki ainalym tapshylyǵy 1,2 paiyzdy quraidy. Ózderińiz kórip otyrǵandai qomaqty qarajat elimizdiń biýdjetine túspeidi», - dedi ol.
