قر مۇناي سەرۆيستٸك كومپانييالار وداعىنىڭ تٶراعاسى راشيت جاقسىلىقوۆ مۇناي باعاسىنىڭ قۇلدىراۋى قازاقستان ەكونوميكاسىنا قالاي ەسەر ەتۋٸ مٷمكٸندٸگٸن ايتتى, دەپ حابارلايدى قازاقپارات.
«مۇناي باعاسى نارىعىندا ٷلكەن تولقىنىس بولۋدى. مۇنايدى ٸرٸ كٶلەمدە تۇتىناتىن قىتاي مەملەكەتٸ كوروناۆيرۋس ٸندەتٸنە بايلانىستى سۇرانىستى اۋقىمدى مٶلشەردە ازايتىپ تاستادى. وعان قوسا, مەملەكەتارالىق ەۋە قاتىناستارىنا, سۋدا جٷزەتٸن تانكەرلەرگە قويىلىپ جاتقان شەكتەۋلەر دە ەسەرٸن تيگٸزۋدە. ەنگٸزٸلٸپ جاتقان كارانتينگە بايلانىستى اۆتوكٶلٸكتەرگە سۇرانىستىڭ ازايۋى دا مۇنايعا دەگەن سۇرانىسقا سٶزسٸز كەرٸ ىقپالىن تيگٸزۋدە», - دەدٸ راشيت جاقسىلىقوۆ بٷگٸن ورتالىق كوممۋنيكاتسييالار قىزمەتٸندە ٶتكەن باسپاسٶز مەسليحاتىندا.
وداق تٶراعاسىنىڭ ايتۋىنا قاراعاندا, مۇناي ٶندٸرۋشٸ مەملەكەتتەردٸڭ ساۋدا «سوعىسى» نارىقتى شيەلەنەستٸرٸپ جٸبەرگەن.
«جوعارىداعى دەرەكتەرگە سٷيەنە وتىرىپ, 2020 جىلى مۇنايعا دەگەن سۇرانىستىڭ ٶتە تٶمەن بولاتىنىن بولجاۋعا بولادى. مۇناي باعاسىنىڭ جاعدايى جاقىن ارادا وڭالادى دەپ ايتۋ ٶتە قيىن. بٸزدٸڭ بولجامىمىز بويىنشا مۇنايعا قاتىستى جاعداي 1-2 جىلعا سوزىلۋى ەبدەن مٷمكٸن», - دەدٸ ول.
راشيت جاقسىلىقوۆ تەك قازاقستاننىڭ عانا ەمەس, بٷكٸل دٷنيەجٷزٸنٸڭ ەكونوميكاسى سىن ساعاتتا تۇرعانىن ايتادى.
«بٸزدٸڭ مەملەكەت ٷشٸن بۇل جاعداي نەسٸمەن اۋىر بولادى? ەلٸمٸز بيۋدجەتٸنٸڭ نەگٸزگٸ كٸرٸسٸن قامتاماسىز ەتٸپ وتىرعان مۇناي جەنە گاز ٶندٸرۋشٸ مەكەمەلەر. ولاردىڭ بيۋدجەتكە تٷسٸرەتٸن تٷسٸمدەرٸ: ۇلتتىق قورعا قۇيىلاتىن ترانسفەر 3,4 ترلن تەڭگە, ساتىلعان ٶنٸمگە سالىناتىن باج كٸرٸسٸ – 1 ترلن تەڭگە. ەگەر مۇناي باعاسى 25 دوللارعا تٷسسە باجدىق الىم تٶلەنبەيدٸ. مۇنايعا قىزمەت كٶرسەتۋ سالاسىنىڭ بيۋدجەتكە بەرٸپ وتىرعان قارجىسى – 500 ملرد تەڭگەنٸ قۇرايدى. مۇناي باعاسى بٷگٸنگٸ كٶرسەتكٸشتە قالا بەرەتٸن بولسا, كٸرٸس ٷش ەسە ازايادى. بيۋدجەتتٸڭ ٸشكٸ اينالىم تاپشىلىعى 1,2 پايىزدى قۇرايدى. ٶزدەرٸڭٸز كٶرٸپ وتىرعانداي قوماقتى قاراجات ەلٸمٸزدٸڭ بيۋدجەتٸنە تٷسپەيدٸ», - دەدٸ ول.
