«ELAMAN» áleýmettik-innovatsiialyq jobalar qorynyń tóraǵasy Almaz Erjan múgedekterge jaǵdai jasaýdyń kemshin tustaryn atady, dep xabarlaidy QazAqparat tilshisi.
«Pandýs, pandýs deimiz. Mysaly, dál qazir men ákimdikke qalai kirdim? Bul jerde deni durys pandýs ta joq. Sol úshin ákimdikti nege jaýapqa tartpaidy? Nege aiyppul salmaidy? Nege ákimdikti eshkim teksermeidi? «Nur Otan» partiiasynyń bas keńsesin alaiyq, ol jaqta múgedekterge arnalǵan dáretxana joq. Ol da durys emes. Zań boiynsha múmkindigi shekteýli adamdardyń quqyǵy da shektelip otyr», - dedi A.Erjan Astanada ótken keńeste.
Atalǵan otyrysta múmkindigi shekteýli jandardyń erkin júrip-turýyna jaǵdai jasaý máselesi talqylandy.
Onyń aitýynsha, elordada jańa nysandar salynǵanda múgedekterdiń máselesi kóp jaǵdaida eskerilmeidi. Bunyń barlyǵyn birden jasaýǵa bolady. Alaida qurylystyń jobasy talqylanǵanda múmkindigi shekteýli jandardy shaqyrmaidy, keńes almaidy.
«Kezinde múgedekter boiynsha keńesshiler bolady dedik. Solar qaida? Qazaqstan boiynsha barlyq ákimdikterde múgedekter boiynsha keńesshiler bar deidi. Biraq biz olardy kórmeimiz. Ne istep jatyr? Jai laýazymdy tasyp júr me? Joq, álde, ákim men ministrdiń «birkasy» siiaqty úndemei otyra bere me? Óz jumysyn kórsetsin! Birge jumys isteiik», - dep atap kórsetti A.Erjan.
