Múmkindigi shekteýli jandar sanatorlyq-kýrorttyq emdelýdi usyný jáne ońaltýdyń tehnikalyq quraldarymen qamtamasyz etý máselelerin kóterýde. Bul týraly elordada ótken dóńgelek ústel otyrysynda QR Eńbek jáne halyqty áleýmettik qorǵaý vitse-ministri Erlan Áýkenov málim etti, dep habarlaidy QazAqparat.
Atap aitqanda, sanatorlyq-kýrorttyq emdeý qyzmetterin memlekettik satyp alý konkýrsynda jeńimpaz bolǵan uiym kórsetedi, ne bolmasa úkimettik emes uiymdarmen shart jasasý arqyly usynylady. Nátijesinde joldamalar ózara yntymaqtastyq ornatqan sanatoriilerge beriledi jáne múgedekter mekemeni óz betinshe tańdai almaidy. Buǵan qosa, sanatorlyq-kýkrorttyq emdeý merzimi aiqyndalmaǵan, sonyń saldarynan túrli óńirlerde onyń uzaqtyǵy 7-den 14 kúnge deiin quraidy.
«Memlekettik satyp alý týraly» Zańǵa sáikes, ońaltýdyń tehnikalyq quraldarymen eń az quny boiynsha nemese ÚEU-dan bir kózden satyp alynady. Bul rette taýarlar múgedektigi bar adamdardyń jeke qajettilikterin eskermesten jappai satyp alynady.
«Qazir biz qoldanystaǵy buiryqqa múgedekter úshin 14 kúnnen kem emes sanatoriialyq-kýrorttyq emdelý merzimin belgileý bóliginde ózgerister engizemiz. 2020 jyldyń shildesinen bastap shipajailyq-kýrorttyq emdeý qyzmetteri áleýmettik qyzmetter portalyna kóshiriledi, bul múgedektigi bar adamdarǵa uiymdy óz betinshe tańdaýǵa múmkindik beredi. Sondai-aq, portaldy iske qosý ońaltýdyń tehnikalyq quraldaryn usyný tetigin jetildirýge múmkindik beredi. 2020 jyldyń qańtarynan bastap jeke irikteýdi talap etpeitin ońaltýdyń tehnikalyq quraldarynyń 55 túriniń 24-i portalǵa, qalǵan 31 túri - 2021 jyldyń qańtarynan bastap aýystyrylatyn bolady. Bul múgedektigi bar adamdarǵa jeke qajettilikterdi, sapany, ónim berýshiniń bedelin, basqa paidalanýshylardyń pikirlerin jáne basqa da máseleni eskere otyryp, ońaltýdyń tehnikalyq quraldaryn óz betinshe tańdaýǵa múmkindik beredi», - dedi Erlan Áýkenov.
Budan buryn habarlanǵandai, atalǵan otyrysqa QR Premer-Ministriniń orynbasary Berdibek Saparbaev, QR Prezidentiniń kómekshisi – QR Prezidenti Ákimshiliginiń ótinishterin qaraýdy baqylaý bóliminiń meńgerýshisi Aida Balaeva, QR Eńbek jáne halyqty áleýmettik qorǵaý ministri Birjan Nurymbetov, sondai-aq birqatar vedomstvolardyń vitse-ministrleri qatysty.
