Foto: pexels.com
Qazaqstandyqtarda múlik salyǵyn tóleýge bir aptadan sál astam ýaqyt qaldy. Ony ýaqytynda tólemegenderge shottardyń buǵattalýy jáne tipti elden shyǵýǵa tyiym salynýy múmkin.
Qazaqstanda jyljymaityn múlki bar barlyq azamat, tipti garaj nemese avtoturaq orny bolsa da, jyl saiyn jeke tulǵalardyń múlik salyǵyn tóleýge mindetti.
Áli kúnge deiin salyqty tólemegen azamattar bul mindetti osy jyldyń 1 qazanyna deiin oryndaýy qajet. Tólemdi keshiktirýge bolmaidy.
Memlekettik kirister komitetiniń (MKK) habarlaýynsha, 2 qazannan bastap salyq somasyn ýaqytynda tólemegen azamattarǵa jeke tulǵalardyń salyqtyq qaryzy týraly habarlamalar jiberiledi.
Osydan keiin 30 kún ótken soń, bir ailyq eseptik kórsetkishten (AEK) asatyn qaryzdar boiynsha májbúrlep óndirý týraly buiryq jiberiledi. Budan keiin taǵy bes kún ishinde ol buiryq jeke sot oryndaýshylaryna (JSO) májbúrlep óndirip alý úshin beriledi.
Nátijesinde boryshkerge salyqty báribir tóleýge týra keledi, biraq oǵan qosa JSO qyzmetteri úshin qaryz somasynyń 25%-yna deiin tóleýge mindetteledi.
Sonymen qatar azamat memleket tarapynan sanktsiialarǵa tap bolýy múmkin: onyń banktik shottary buǵattalyp, elden shyǵýǵa tyiym salynady.
"Sondyqtan, artyq shyǵyndar men máselelerden aýlaq bolý úshin múlik salyǵyn ýaqytynda tóleýdi usynamyz", - dep qorytyndylady MKK ókilderi.
Eske sala keteiik, Qazaqstanda keibir sanattaǵy azamattar salyq tóleýden bosatylǵan nemese belgili bir jeńildikterge ie. Sondai-aq, qazaqstandyqtar múlik salyǵyn tóleý qajettiligi týraly habarlamalardy jazdyń ortasynan bastap ala bastaǵanyn atap ótken jón. Tólem jasaǵan azamattarǵa ony qaitadan tóleýdiń qajeti joq.
