Jýyrda «Atameken» biznes ortalyǵynda «Atamekenim» atty respýblikalyq aktsiiany túsindirý maqsatynda baspasóz máslihaty ótti, dep habarlaidy "Ult aqparat".
Memleket basshysy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasyndaǵy tapsyrmalardy júzege asyrý úshin qolǵa alynǵan bul aktsiia kásipkerlerge arnalǵan. Jiyndy OQO kásipkerler palatasy uiymdastyrdy.
Qazir oblysta qaiyrymdylyq sharalarymen udaiy ainalysyp júrgen kásipkerler bar. Olar áleýmettik nysandar salyp, turmys jaǵdaiy tómen otbasylarǵa qarjylai qoldaý kórsetip júr. Degenmen, kásipkerler ózderi usynǵan qarajattyń igi maqsatta jumsalǵanyna senimdi bolýy úshin olardyń bastamalaryn úilestiretin ortalyq qajet-aq. Óitkeni, qazir jurttan aqsha jinap alyp, óz maqsatyna paidalanatyn alaiaqtar az emes. Sonymen qatar, qaiyrymdylyq jasaý maqsatynda kómekke muqtaj turǵyndardy izdep júrgen qaltaly azamattar da az emes. Olarǵa da jón silteitin mekeme kerek. Endi osy mindettermen «Atameken» Ulttyq kásipkerler palatasy ainalysatyn boldy. Onyń saitynda elimizge tanymal kásipkerler men metsenattardyń reestri ornatylady. Kómekke muqtaj kez kelgen azamat osy saitqa kirip, ótinish qaldyrady. Kásipkerler ótinishterdi kórip, kómegin kórsetedi.
OQO Kásipkerler palatasynyń direktory Asqar Ábýbákirov «Atamekenim» aktsiiasy kásipkerlerdiń bedelin kóterip, olardyń qoǵammen bailanysyn kúsheitetinin aitty.
– Bul – biznestiń áleýmettik jaýapkershiligin júzege asyrýǵa baǵyttalǵan joba. Oblysymyzda qaiyrymdylyqpen ainalysatyn kásipkerler barshylyq. Olar jasaǵan jaqsylyǵyn jariialaýdy jón kórmegendikten, kóp jaǵdaida eleýsiz qalyp qoiady. Sol úshin biz olardyń eńbegin baǵalap, metsenat kásipkerlerdi qoǵamǵa úlgi etýge tiispiz. Osy arqyly ózge azamattardy qaiyrymdylyq jasaýǵa úgitteimiz. Búginde oblystardyń tabysy salyq túsimderi men biýdjet kólemimen esepteledi. Meniń oiymsha, kásipkerlerdiń qaiyrymdylyq jasaý kórsetkishi de saralanyp, jurtshylyqqa aitylýy tiis, – deidi ol.
Jiynda jomarttyq jasap kózge túsken isker azamattarǵa memleket tarapynan túrli jeńildikter jasalatyny da aityldy. «Atameken» kásipkerler palatasy bul baǵytta óz usynystaryn ázirlegen. Máselen, Salyq kodeksiniń 133-baby boiynsha biznestiń áleýmettik jaýapkershiligi aiasynda qaiyrymdylyq jasaǵan kásipkerlerge salyq tóleýde jeńildik qarastyrylǵan.
«Atameken» kásipkerler palatasynyń sarapshysy Maiia Isaevanyń aitýynsha, eger kásipker qarjylai kómekteskisi kelse, aldymen sol muqtaj adam tarapynan ótinish jazylýy tiis. Ol arnaiy tirkelip, kómek kórsetilgeni jóninde resmi qujat saqtalady. Atalǵan qujat arqyly salyq tóleýde memlekettik jeńildikterge qol jetkizýge bolady.
Aita keteiik, kómekke muqtaj jandar Facebook pen Instagram paraqshalaryndaǵy jalpyǵa ortaq topta da ótinim qaldyra alady. Atalǵan aktsiia jyl sońyna deiin jalǵaspaq.
