QR Mádeniet jáne sport ministri Arystanbek Muhamediuly «Kókpar» federatsiiasynyń prezidenti Muhtarhan Dildábekovty qabyldap, kezdesý barysynda kókpardyń keleshegi, aldaǵy jarystarǵa daiyndyq máselesin talqylady, dep habarlaidy QazAqparat tilshisi.
«Elbasy Joldaýynda tapsyrǵandai, qazirgi kezde buqaralyq sport túrlerine, onyń ishinde ulttyq sportty damytýǵa erekshe kóńil bólinip jatyr. Sonyń aiasynda, árine, bizdiń alǵa qoiǵan maqsattyrymyz bar. Ózińiz biletindei, «Kókpar» federatsiiasynyń basshylyǵyna Muhtarhan Dildábekovty shaqyryp otyrmyz. Muhtarhan bokstyń aldynda kókpar oinaǵan. Kókpardan boksqa kelip, az ǵana ýaqyt ishinde Sidnei Olimpiadasynda kúmis júldeger boldy. Osy qaýymdastyqty basqarýǵa kelip otyrǵan Muhtarhanǵa kóp-kóp rahmet aitamyz», - dedi ministr.
Arystanbek Muhamediuly óz sózinde Ast
«Sońǵy kezde kókpardyń ainalasynda keleńsiz jaǵdailar bolǵanyn bilesizder. Ony da túzetýimiz kerek. Sol sebepten ózimiz ótinish bildirip, Muhtarhan Dildábekovke usynys jasaǵan edik. Qazirgi kezde ulttyq sportty ary qarai damytý úshin Astanada birinshi ret respýblikalyq ulttyq sportty damytý ortalyǵyn qurdyq. Áýejaiǵa bara jatqan joldaǵy «Qazanatty» jandandyrdyq, onda ortalyq jumys istep tur. Kókpardan ol jerde Álem chempionatyn ótkizdik. Odan basqa, EKSPO aiasynda ulttyq sport túrlerinen jarystar ótkizdik. Endigi kezekte Astanada Ulttyq sport túrlerinen ótetin Olimpiadaǵa daiyndalyp jatyrmyz», - dedi ministr.
Óz kezeginde «Kókpar» federatsiiasynyń prezidenti Muhtarhan Dildábekov senim artyp, ulttyq qaýymdastyq prezidenttigine sailaǵandyqtan, úmitti aqtaýǵa tyrysatynyn aityp ótti.
«Bala kezden kókpar tartyp, keiin oblys ortalyǵy Shymkentke kelip bokstastyq. Osy 7-8 jyldyń ishinde boks mektebinde jumys istep kele jatyrmyn. Sonymen birge, kókpardy da igeremiz degen úmittemiz. Kókparshyǵa oiyn kezinde jan-jaqty myqtylyq kerek. Ózińizdiń qoldaýyńyzben kókpardy kóterip, 2020 jylǵy Ulttyq olimpiadada jaqsy nátije kórsetemiz degen niettemiz», - dedi Muhtarhan Dildábekov ministrge.
Sonymen birge, Muhtarhan Dildábekov kelesi Dúniejúzilik Kóshpendiler oiyndaryna daiyndyq myqty bolatynyna ýáde berdi.
«Bul jaqta da úlken jarystar bolyp, ekinshi, úshinshi nómirli sportshylar baryp (Qyrǵyzstanǵa), jaqsy kórsetkishke qol jetkize almady. Kelesi joly jaqsy balýandar barady. Bolmasa, ózim shyǵam», - dep ázilmen aiaqtady sózin Muhtarhan Dildábekov.
Eske sala ketsek, respýblikalyq «Kókpar» federatsiiasynyń prezidenti bolyp Muhtarhan Dildabekov taǵaiyndalǵanyn habarlaǵan bolatynbyz. Dańqty boksshy Muhtarhan Dildábekov esimi sportsúier qaýymǵa jaqsy tanys. Eki Olimpiada oiyndarynda baq synaǵan, Sidnei Olimpiadasynyń kúmis júldegeri, HII Aziia oiyndarynyń jeńimpazy, HIV Aziia oiyndarynyń kúmis júldegeri, Álem chempionatynyń kúmis júldegeri atanǵan ataqty boksshy Muhtarhan Dildábekov 1976 jyly Túrkistan oblysy Maqtaral aýdany, Abai aýylynda dúniege kelgen. Qazaqstan Respýblikasynyń eńbek sińirgen sport sheberi. Bilimi joǵary. M.Áýezov atyndaǵy Ońtústik Qazaqstan memlekettik ýniversiteti, Q.A.Iasaýi atyndaǵy Halyqaralyq qazaq - túrik ýniversitetin támamdaǵan. «Parasat» ordeniniń iegeri, Ońtústik Qazaqstan oblysynyń Qurmetti azamaty.
