"Qazatomónerkásip" ulttyq kompaniiasynyń burynǵy jetekshisi, qazaqstandyq quqyq qorǵaýshylar "saiasi tutqyn" sanatyna qosqan Muhtar Jákishev shartty jazamen bostandyqqa shyǵatyn boldy. Búgin, 3 naýryzda Semei qalalyq №2 soty Muhtar Jákishevtiń merziminen erte bosatý týraly úshinshi ótinishin qanaǵattandyrdy.
Sot sheshimi boiynsha, Muhtar Jákishev "probatsiialyq baqylaýǵa alynady, jaza merzimi tolyq aiaqtalmaiynsha Qazaqstan aýmaǵynan shyǵarylmaidy".
Sot otyrysyna Qazaqstannyń ár túkpirinen qoǵam belsendileri men Muhtar Jákishevti qoldaýshylar, Eýropa men Nur-Sultandaǵy elshilikterden kelgen baqylaýshylar da jinaldy. Olar sot bastalmai turyp zalda Muhtar Jákishevke bostandyq surap, urandatty. Jákishevtiń ózi sotqa kelgen joq, kezekti protseske skaip arqyly qatysty.
"Meniń Qazaqstan azamaty retindegi basty ótinishim, maǵan qatysty Qazaqstan Respýblikasynda qabyldanǵan zań qoldanylǵany", - dedi ol.
Jákishevtiń tártibi durys degen úshinshi dárejesi bar, bul eń jaqsy kórsetkish sanalady. Koloniia ókili video-konferents-bailanys arqyly sottalýshynyń minezdemesi oń ekenin rastady (durys tártibi úshin jeti márte madaqtalǵan) jáne merziminen buryn shartty túrde bosatýǵa negiz bar dep esepteitinin aitty.
Budan keiin Jákishevtiń advokaty Nurlan Beisekeev sóz sóiledi.
"Osy ýaqyt boiynda Jákishev 24 gipertoniialyq krizdi bastan ótkerdi. Áli de gipertoniialyq shabýyly jalǵasyp jatyr. 2020 jylǵy 6 aqpanyndaǵy anyqtama boiynsha Semei qalasy meditsinalyq mekemelerinde Jákishevtiń basqa da aýrýlarǵa dýshar bolǵany dáleldendi. Onyń jaǵdaiy jaqsarmai keledi, nasharlap ketti, al kúnine 40-tan asa dári qabyldaýy kerek", - dedi advokat.
Prokýror sýdiadan advokat Nurlan Beisekeevtiń Jákishevti shartty túrde merziminen buryn bosatý týraly ótinishin qanaǵattandyrmaýdy suraǵan bolatyn. Aitýynsha, sottalýshy 99 milliard teńge shyǵynnyń tek 200 myń teńgesin ǵana ótegen.
Byltyr 24 shildede Semei qalasynyń №2 soty túrmede otyrǵanyna 10 jyldan asqan Muhtar Jákishevtiń shartty jazamen merziminen buryn bostandyqqa shyǵarý týraly ótinishin qanaǵattandyrýdan bas tartqan. Semei soty "Jákishev memleketke keltirgen 99,6 milliard teńge (qazirgi kýrspen 258 million dollar) shyǵyndy ótemegenin" aitqan. Qyrkúiek aiyndaǵy apelliatsiialyq sot burynǵy sheshimdi ózgertpedi.
Sottyń aldynda jáne odan keiin Qazaqstannyń birneshe qalasynda bilikten Jákishevti bosatýdy talap etken narazylyq aktsiialary ótti.
Muhtar Jákishevti saiasattanýshylar "bilikti menedjer" dep sanaidy. Ol 2009 jyly mamyrdyń 21-ine "Qazatomónerkásibi" kompaniiasynyń basshysy qyzmetinen alynyp, mamyrdyń 24-ine tutqyndalǵan. "Venada (Avstriia) "Qazatomónerkásip" kompaniiasynyń zańsyz ókildigin ashý arqyly paida tapty, astyrtyn kassa ustady, kúzetshisine qosymsha eńbekaqy tólep kelgen" degen aiyppen 14 jylǵa sottalǵan.
2012 jyly maýsym aiynda Muhtar Jákishevtiń ústinen qozǵalǵan taǵy bir is boiynsha Astana qalasyndaǵy Saryarqa aýdanynyń №2 soty úkim shyǵardy.
Oǵan "iri kólemdegi alaiaqtyq" (qylmystyq kodekstiń 177-baby) jáne "ózine senip tapsyrylǵan bóten múlkin iemdenip, shyǵyndaý" (176-bap), "zańdastyrý" (193-bap), "qylmystyq top qurý" (235-bap), "qyzmettik ókiletin asyra paidalaný" (307-bap) baptary boiynsha aiyptar taǵylyp, 10 jylǵa bas bostandyǵynan aiyrý jazasyn belgiledi. Bul jaza burynǵy 14 jyldyq jazamen biriktirildi. Ekinshi qylmystyq is boiynsha sot otyrystaryna Muhtar Jákishev pen onyń ózi jaldaǵan advokattary qatyspaǵan.
Túrmede otyrǵan kezde úshinshi top múgedektigin alǵan Jákishev ózine taǵylǵan aiyptarmen kelispeidi. Otandyq quqyq qorǵaýshylar Jákishevti "saiasi tutqyndar" tizimine qosqan. Qazaqstan biligi elde "saiasi tutqyndar joq" dep esepteidi.
