Sergei Lavrovtyń sapary Qazaqstan men Resei arasyndaǵy qatynastardy nyǵaitýǵa jáne keńeitýge degen ortaq nietimizdi rastaidy. Búgingi ekijaqty kelissózderdi qorytyndylaǵan Syrtqy Ister ministri Muhtar Tileýberdi osyndai pikir bildirdi, dep habarlaidy QazAqparat.
«Reseimen yntymaqtastyq Qazaqstan syrtqy saiasatynyń basym baǵyttarynyń biri boldy jáne solai qala beredi. Osy jyldar ishinde Qazaqstan dostas seriktestik qatynastarǵa beriktigin kórsetti.
Jaqyn kúnderi «Baiqońyr» ǵarysh ailaǵynan adamnyń tuńǵysh ret ǵaryshqa ushqanyna 60 jyl tolatyny da simvoldyq mánge ie. Búginde Baiqońyr – Qazaqstan men Resei arasyndaǵy strategiialyq seriktestik pen yntymaqtastyqtyń simvoly. Ǵarysh ailaǵyn damytý, «Báiterek» ǵaryshtyq zymyran keshenin qurý, Jerdi qashyqtyqtan zondtaý salasyndaǵy ózara árekettesý, sondai-aq «Gagarin starty» jobasyn jańǵyrtý boiynsha jumystar jalǵasýda», - dedi vedomstvo basshysy.
Ministr kelissóz kezinde halyqaralyq kún tártibindegi túrli máseleler boiynsha eki taraptyń ustanymdary talqylanǵanyn atap ótti.
«Biz TMD, UQShU, BUU, EQYU, ShYU jáne AÓSShK siiaqty halyqaralyq uiymdardyń alańdaryndaǵy birlesken jumysqa úlken mán beremiz. Halyqaralyq kún tártibindegi túrli máseleler boiynsha ustanymdardyń ortaqtyǵyn rastap, qaýipsizdik negizderin aimaqtyq ári jahandyq deńgeide de nyǵaitý boiynsha birlesken qadamdardy jalǵastyrýǵa kelistik.
Kórip otyrǵandaryńyzdai, COVID-19 pandemiiasyna qaramastan, biyl elderimiz arasyndaǵy qatynastardyń joǵary serpini saqtalyp otyr, bul yntymaqtastyǵymyzdy únemi baqylaýǵa múmkindik beredi. Bizge memleket basshylarymyz qoiǵan qazirgi jáne uzaq merzimdi mindetterdi sheshýge syndarly tásilder qajet.
Lavrov myrzanyń sapary Qazaqstan men Resei arasyndaǵy san qyrly jáne keshendi qatynastardy nyǵaitýǵa jáne keńeitýge degen ortaq nietimizdi rastaidy.
Búgingi kezdesýdiń nátijeleri yntymaqtastyqty odan ári damytýdyń kepili bolatynyna jáne halqymyzdyń múddeleri negizinde tatý kórshilik pen seriktestikke tyń serpin beretinine senimdimin», - dedi Muhtar Tileýberdi.
