QR Syrtqy ister ministrligi Muhtar Tileýberdi qazaqstandyq diplomattardy kásibi merekesimen quttyqtady, dep habarlaidy "Ult aqparat".
«Qurmetti qazaqstandyq diplomattar! Qurmetti ardagerler! Osydan 28 jyl buryn 2 shildede Memleket basshysy Táýelsiz Qazaqstannyń syrtqy saiasi vedomstvosyn qurý týraly Jarlyqqa qol qoiǵany ózderińizge málim. Sol kezdegi kúrdeli jaǵdaiǵa qaramastan, Ministrliktiń alǵashqy qyzmetkerleriniń janqiiarlyǵy men kásipqoilyǵy arqasynda diplomatiialyq qyzmettiń basty negizderi, irgetasy men jumys qaǵidattary is júzinde «taza paraqtan» qalyptastyryldy. Jańa qurylǵan otandyq diplomatiialyq qyzmettiń kadrlyq, qarjylyq máselelerin sheshýde, bizdiń shet elderdegi alǵashqy ókildikterdi ashý baǵytynda qomaqty jumys atqaryldy. Aǵa býyn ókilderiniń is-áreketteri nátijesinde «Syrtqy ister ministrliginiń rýhy» qalyptasty. Osy oraily sátti paidalanyp ardagerlerimizge alǵys, salamyzdyń qalyptasýyna uiytqy bolǵan tulǵalarǵa shynaiy qurmetimdi bildirgim keledi. Memleketimizdiń halyqaralyq arenadaǵy búgingi tabystary men jeńisteri birinshi kezekte Sizderdiń eńbekterińiz» dep atap ótti Syrtqy ister ministri óz quttyqtaýynda.
Onyń aitýynsha, Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń jáne Prezidentimiz Qasym-Jomart Toqaevtyń jetekshiligimen elimizdiń syrtqy saiasaty pragmatizm jáne konstrýktivizm qaǵidattary, tiimdi yntymaqtastyq pen qarym-qatynastar negizinde damyp kele jatyr.
«Búginde biz álemniń 182 memleketimen diplomatiialyq qarym-qatynas ornattyq, elimizdiń mańyzdy halyqaralyq uiymdarǵa kirýin qamtamasyz ettik. Qazaqstannyń álemniń 103 eldi qamtityn, 98 shet elderdegi mekemesi bar. Biz kópjaqty jáne ekijaqty yntymaqtastyqtyń 3700 astam halyqaralyq qujattan turatyn qomaqty sharttyq-quqyqtyq bazasyn jasadyq, ol ulttyq múddeler men ózekti halyqaralyq máselelerdiń barlyǵyn qamtidy. Qazaqstannyń memlekettik shekarasyn delimitatsiialaý týraly halyqaralyq sharttarǵa qol qoiylýy jáne olardyń kúshine enýi qazaqstandyq diplomatiianyń mańyzdy jetistikteriniń biri bolyp tabylady. Búgin bizdiń syrtqy shekaramyz – tatý kórshilik pen yntymaqtastyq shegi retinde qarastyrylady. Táýelsizdiginiń alǵashqy jyldarynda «qaýipsizdikti tutynýshy» jáne álemdik saiasatqa jańadan aralasa bastaǵan Qazaqstan búginde «turaqtylyq generatoryna» jáne keibir janjaldardy retteýge belsendi túrde atsalysqan mediatorǵa ainaldy» deidi Muhtar Tileýberdi.
Ministrdiń sózine sensek, halyqaralyq arenadaǵy aitarlyqtai jetistikterimizge qaramastan, biz qol jetkizgen tabystarymyzben toqtalyp qala almaimyz, alda bizdi aýqymdy jańa jumystar kútip tur. Álemde eski qubylystar transformatsiialanýda, kóptegen oń nemese teris sipattaǵy kúrdeli jańa protsester óris alýda.
Muhtar Tileýberdi atap kórsetkendei, bizdiń mindetimiz - syn-tegeýrinderge laiyqty jáne nátijeli den qoiyp, jańadan ashylǵan múmkindikterdi tolyǵymen ári tiimdi paidalaný.
«Bul maqsatta bizdiń diplomattardyń qazirgi býynynan jumysta kreativti ádisterdi qoldanýyn, tolyqtai kúsh-jigerin jumsaýyn ári óziniń kásibi deńgeiin únemi jaqsartýyn kútemiz. Bul syrtqy saiasi vedomstvonyń jańa sapaly deńgeige ótýine yqpal etedi. Sonymen qatar, osy jyl álemdi dúrliktirgen jáne tynysyn taryltqan, halyqaralyq qarym-qatynastarǵa kedergi keltirgen qaterli dert - koronavirýs indetimen kúresý jyly bolyp otyr. Álemde pandemiia jariialanǵannan keiin Ministrligimiz ben diplomatiialyq ókildikterimiz Qazaqstan azamattarynyń elge oralýyna bar kúsh-jigerin salyp, shet memleketterdiń meditsinalyq kómegi men jabdyqtaryn alýǵa atsalysty. Bul oraida, elimizdegi tótenshe jaǵdai men karantin kezeńi úshin arnaiy qurylǵan SIM Shtabynyń, konsýldardyń jáne belsendilik kórsetken basqa da áriptesterimizdiń jumysyn erekshe atap ótkim keledi. Bizdiń aldymyzda asar belester men baǵyndyrar shyńdar áli de barshylyq. Olarǵa qol jetkizý úshin bárimizdi jumylǵan judyryqtai birtutas mehanizm bolyp jumysty jalǵastyrýǵa shaqyramyn! Syrtqy saiasat salasyndaǵy qajyrly eńbekterińiz úshin shynaiy alǵysymdy bildire otyryp, Sizderdiń barshańyzdy búgingi merekemen shyn júrekten quttyqtaimyn. Egemendi elimizdiń igiligi úshin atqaryp jatqan qyzmetterińiz jemisti bolsyn. Elimizge tynyshtyq, jerimizge bereke, otbasylaryńyzǵa baqyt jáne zor densaýlyq tileimin « dep túiindedi sózin Muhtar Tileýberdi.
