Ulttyq qoǵamdyq keńestiń múshesi, belgili qoǵam belsendisi Muhtar Taijan Prezidenttiń Úkimettiń keńeitilgen otyrysynda bergen tapsyrmalaryna qatysty pikir bildirdi, dep habarlaidy "Ult aqparat".
«Jalpy alǵanda maǵan Prezidenttiń búgingi sózi unady. Nieti, baǵdary durys. Bizdi tyńdap, oqyp otyrǵany baiqalady. Árine, áitse de tikelei efirden kórsek jaqsy bolar edi. Meditsinalyq-áleýmettik saqtandyrý qory, «SQ-Farmatsiia», jergilikti ózin-ózi basqarý, jańa kadrlar, memlekettik basqarý júiesi, úkimettiń otstavkasy týraly aitqandarynyń barlyǵy durys. Biraq men úshin, jalǵyz men ǵana emes, barlyǵymyz úshin jerge qatysty myna málimdemesi taǵdyrsheshti sóz dep sanaimyn: «Jer sheteldikterge satylmaidy - bul máselege endi oralmaimyz. 2021 jyly moratorii aiaqtalǵansha bul máseleni túpkilikti sheshý kerek», dep Muhtar Taijan Facebook paraqshasynda Prezidenttiń sózin keltirdi.
Muhtar Taijan óz tarapynan úlken mólsherdegi jer telimderi, iaǵni aýylsharýashylyǵy jerleri jeke menshikke eshkimge satylmaýy kerektigin jazǵan.
«Qazaqstan azamattaryna da, sheteldik úlesi bar firmalarǵa da, tek arendaǵa berilýi tiis. Bunyń barlyǵy jańa zańda rettelýi tiis jaǵdaiattar. Jer máselesimen 2016 jyldan beri ainalysyp júrgen azamat retinde atap ótkim keledi, máseleni kezeń-kezeńmen sheshý taktikasy ózin aqtady: aldymen 5 jyldyq moratorii jariialadyq (ýaqyttan uttyq), endi naqty sheshim qabyldaimyz. Jer máselesi – iri latifýndisterdiń kóptegen milliardtyq múddeleri bar óte kúrdeli másele. Barlyǵyn birden 2016 jyly sheship tastaý múmkin emes edi – saiasi ahýal oǵan jol bermedi. Ómirde de ózi mundai jaǵdailar bolady, bári birden ornai salmaidy. Biraq, eń bastysy – aqyrǵy nátije. Munyń barlyǵy halyqtyń óziniń patriotizmi, barlyǵymyzdyń qanǵa sińgen óz jerine degen mahabbatynyń arqasynda múmkin boldy», - deidi Muhtar Taijan.
