«Jer jappai satylady jáne sheteldikterge jalǵa beriledi» degen maǵynadaǵy áleýmettik jelide taraǵan aqparattar jalǵan. OKQ-da ótken baspasóz máslihatynda qoǵam qairatkeri Muhtar Taijan osylai málim etti, dep habarlaidy QazAqparat tilshisi.
«Bul zań erekshe zań deýge bolady. Óitkeni, bul zań jer komissiiasynyń sheshimderi boiynsha daiyndalǵan. Men osynda otyrǵan adamdarmen (AShM ókilderimen - avt.) bir jarym jyl ýaqyt jumys istegenmin. Ókinishke qarai, sońǵy kúnderi áleýmettik jelilerde «aqpannyń 14-nen keiin jer jappai satylady jáne sheteldikterge jalǵa beriledi» degen arandatýshy aqparattar paida boldy. Resmi túrde aityp otyrmyn: ol jalǵan, ótirik ári arandatýshy aqparat dep esepteimin», - deidi ol.
Muhtar Taijannyń aitýynsha, zań jobasynda ol týraly birde-bir sóz joq.
«Men oǵan óz basym kepil bere alamyn. Kerisinshe, biz qaraǵan zań jobasynda halyqqa paidaly ári tiimdi nárseler bar. Mysaly, jaiylymdyq jer, 10 sotyq jer týraly, latifýndizmge qarsy naqty normalar bar. Sondyqtan, bizdiń zańymyz qabyldanǵannan keiin «jer jappai satylady nemese sheteldikterge jalǵa beriledi» degen sóz jalǵan. Sodan keiin hattyń (aqparattyń) avtory da joq. Qarapaiym sózben aitsaq, bul - anonimka. Eger bul hattyń avtorynda faktiler men dálelder bolatyn bolsa, nege halyqtyń aldyna shyqpaidy? Nege dálelderin kórsetpeidi?», - deidi Muhtar Taijan.
Ol sonymen birge, osy máselege qatysty aqpannyń 16-synda osynda úlken jiyn, qoǵamdyq talqylaý ótkiziletinin aitty.
«Jan-jaqtan, aimaqtardan bedeldi, salmaqty azamattar keledi. Bilikti zańgerler táýelsiz saraptama daiyndap, qoǵam talqylaýynda baiandap beredi. Sondyqtan, bul zańda esh halyqtan jasyratyn nemese halyqqa ziiandy nárseler joq. Muny men senimdilikpen aityp otyrmyn», - dep túidi Muhtar Taijan.
Aita ketsek, qazirgi ýaqytta QR Parlament Májilisiniń jumysynda «Jer qatynastaryn retteý máseleleri boiynsha QR keibir zańnamalyq aktilerine ózgerister men tolyqtyrýlar engizý» týraly zań jobasy qaralýda.
