Almatyda dástúrli «Altyn dombyra» respýblikalyq aqyndar aitysy óz máresine jetti. Besinshi ret uiymdastyrylyp otyrǵan aqyndar báigesi el Táýelsizdiginiń 25 jyldyǵyna arnaldy, dep habarlaidy "Ult aqparat".
Eki kúnge sozylǵan aqyndar alamynyna jyl boiy jeńimpazdar qatarynan kórinip, úzdik nátijie kórsetken 20 aqyn qatysty.
Aitysqa Ádilbek Ybyraiymuly, Qonysbai Ábilov, Qoilybai Asanov, Muhamedjan Tazabek, Amanjol Áltaev, Dáýletkerei Kápuly, Baýyrjan Haliolla syndy tanymal aqyndar qazylyq etti.
Aitystyń birinshi kezeńinde Ershat Qaiboldin - Syrym Ədilbek, Maqsat Aqanov - Ásem Erejeqyzy, Shuǵaiyp Sezimhan - Jansaia Mýsina, Aibek Qaliev - Meiirbek Sultanhan, Serikzat Dúisenǵazy - Iran-Ǵaiyp Kúzembaev, Rústem Qaiyrtaiuly - Ómirjan Kópbosynov, Qalijan Bildashev - Bolatbek Meiirbekuly, Erkebulan Qainazar - Muhtar Niiazov, Erjan Ámirov - Aspanbek Shuǵataev, Nurlan Esenqulov - Nurmat Mansurovtar syndy on jup aitysty.
Ekinshi kúni aqyndardyń alty juby sahnaǵa shyqty. Atap aitsaq, Meiirbek Sultanhan - Ómirjan Kópbosynov, Erkebulan Qainazar - Qalijan Bildashev, Muhtar Niiazov - Serikzat Dúisenǵazy, Bolatbek Orazbaev - Aspanbek Shuǵataev, Iranǵaiyp Kúzembaev - Jansaia Mýsina, Rústem Qaiyrtaiuly - Erjan Ámirov ózara sóz saiysyna tústi.
Qazylardyń sheshimimen eń kóp upai jinaǵan Bolatbek Orazbaev pen Serikzat Dúisenǵazy, Muhtar Niiazov pen Jansaia Mýsina "Altyn dombyra" úshin aiqasqa shyqty.
Tartysqa toly dúldilder dodasynda jeńimpazdy anyqtaý ońaiǵa soqqan joq. Qazylar sheshimimen aitystyń bas júldesin qyzylordalyq Muhtar Niiazov jeńip aldy. Ol "Altyn dombyramen" qosa 3 000 000 teńge qarjylai júldege ie boldy.
Al, birinshi oryn almatylyq Bolatbek Orazbaevtyń enshisine buiyrdy. Bolatbek 2 000 000 teńgeni qanjyǵasyna bailady. Ekinshi oryn oraldyq aqyn qyz Jansaia Mýsinaǵa (1 000 000 teńge) buiyrdy.
Júldeli úshinshi oryndy Serikzat Dúisenǵazy, Meiirbek Sultanhan, Ómirjan Kópbosynov, Iranǵaiyp Kúzembaev ózara bólisti. Tórt aqynǵa 500 000 teńgeden qarjylai syilyq berildi. Qalǵan qatysýshy aqyndarǵa 250 000 teńgeden berildi.
Gran-pri iegerin Almaty qalasynyń ákimi Baýyrjan Baibektiń ózi quttyqtap, júldesin tapsyrdy.
