Parlament Senatynyń jalpy otyrysynda Halyqaralyq qatynastar, qorǵanys jáne qaýipsizdik turaqty komitetiniń tóraǵasy sailandy, dep habarlaidy "Ult aqparat".
«Bul komitettiń tóraǵasy laýazymyna Muhtar Abraruly Qul-Muhammedtiń kandidatýrasyn usynamyn. M. Abraruly belgili qoǵam jáne memleket qairatkeri. «Nur Otan» partiiasy Tóraǵasynyń birinshi orynbasary, Memlekettik hatshy, ministr, oblys ákimi bolyp asa jaýapty laýazymdardy abyroimen atqardy. Bilimdi, bilikti jáne tájiribeli depýtat», - dedi Senat spikeri Dariǵa Nazarbaeva.
Senatorlar Halyqaralyq qatynastar, qorǵanys jáne qaýipsizdik turaqty komitetiniń tóraǵasy qyzmetine Muhtar Qul-Muhammedti sailaý týraly sheshimdi biraýyzdan qoldady.
«Búgingi kórsetken qoldaý men senim - bul men úshin úlken jaýapkershilik. Sondyqtan barlyq kúsh-jigerimdi osy senimdi aqtaýǵa jumsaityn bolamyn. Barshańyzǵa rahmet!», - dedi M. Qul-Muhammed.
M. Abraruly 1960 jyly 12 jeltoqsanda týǵan, qazaq, bilimi joǵary. S.M. Kirov atyndaǵy Qazaq memlekettik ýniversitetin bitirgen. Jýrnalist, zań ǵylymdarynyń doktory, professor. QR Mádeniet, aqparat jáne qoǵamdyq kelisim ministri, QR Prezidentiniń Keńesshisi, baspasóz hatshysy, QR Prezidenti Ákimshiligi Basshysynyń orynbasary, Qyzylorda oblysynyń ákimi, «Nur Otan» partiiasy Tóraǵasynyń birinshi orynbasary bolyp qyzmet atqardy. «Qurmet», «Parasat», III dárejeli «Barys» ordenderimen marapattalǵan.
Esterińizge sala keteiik, Halyqaralyq qatynastar, qorǵanys jáne qaýipsizdik turaqty komitetiniń tóraǵasy qyzmetin Dariǵa Nazarbaeva atqarǵan edi. Biylǵy 20 naýryz kúni Dariǵa Nazarbaeva QR Parlamenti Senatynyń spikeri bolyp sailandy.
