Foto: Jazýshylar odaǵy
Búgin «Almaty Kitaphanalaryna» qarasty №4 kitaphana-bólimshesine Muhtar Áýezovtiń aty berilýine arnalǵan saltanatty shara ótti, dep habarlaidy Ult.kz.
Saltanatty rásimge Almaty qalalyq Mádeniet basqarmasy basshysynyń orynbasary Arman Halbekov, Qazaqstan Jazýshylar odaǵy Basqarmasynyń tóraǵasy Mereke Qulkenov, jazýshynyń nemeresi – «Dinmuhamed Qonaev halyqaralyq qorynyń» prezidenti Eldar Qonaev, sondai-aq belgili qoǵam qairatkerleri, ádebiet pen mádeniet ókilderi, ziialy qaýym qatysty.
1974 jyly irgetasy qalanǵan tarihi kitaphanaǵa uly qalamgerdiń esiminiń berilýimen sharaǵa qatysýshy ziialy qaýymdy quttyqtaǵan Mereke Ábdeshuly búgin shynynda da qýanyshty kún ekendigin atap ótti.
"№4 kitaphana-bólimshesi – Almaty qalasyndaǵy eń iri jáne jetekshi kitaphanalardyń biri. Kitap qory 34 000 danany quraityn, al jyldyq kelýshiler sany 350 000-nan asatyn kitaphanaǵa Muhtar Omarhanuly Áýezovtiń esimin berý – rýhaniiat janashyrlary úshin úlken qýanysh. Almatynyń kúre tamyry ispetti Abai dańǵylynyń boiynda ornalasqan osynaý parasat ordasyna uly qalamgerimizdiń esimi berilýi tekten-tek emes dep oilaimyn. Kitaphana izdenis pen bilimniń, danalyq pen jańashyldyqtyń ordasyna ainalsyn. Oqyrmandaryńyz kóp bolyp, eńbekterińiz jemisti bolsyn!", - dedi Mereke Qulkenov.
Saltanatty sharadan soń atalǵan kitaphana ǵimaratynda «Muhtar Áýezovtiń Qazaqstan mádenieti men ádebietiniń damýyna qosqan úlesi» atty dóńgelek ústel ótti. Dóńgelek ústeldi Muhtar Áýezov atyndaǵy Ádebiet jáne ónertaný institýtynyń direktory Kenjehan Matyjanov júrgizdi. Jiyn barysynda M.Áýezovtiń nemeresi, shyǵystanýshy jáne túrkitanýshy Zifa-Alýa Áýezovanyń onlain-quttyqtaýy tyńdalyp, aqyn ári diplomat Oljas Súleimenovtiń atynan qyzy Mádina Súleimenova sóiledi. Sonymen qatar, kitaphanaǵa Murat Muhtaruly Áýezovtiń jeke kitaphanasynan kitaptardy syiǵa tartý rásimi ótti.
Buǵan qosa, kórnekti ǵalym, arheolog jáne etnograf Álkei Marǵulannyń buryn jaryq kórmegen «Muhtar Áýezov týraly estelikter» atty eńbeginiń tusaýy kesildi. Bul týyndy alǵash ret arab tilindegi túpnusqadan qazaq jáne orys tilderine aýdarylyp otyr.
Sonymen qatar kitaphanada Muhtar men Murat Áýezovterge arnalǵan memorialdyq bólme ashyldy. Rýhani sabaqtastyq pen shyǵarmashylyqtyń erekshe ordasyna ainalatyn bul keńistikte jazýshy men qoǵam qairatkerleriniń jeke zattary, sirek kádesyilar, úi jihazynyń elementteri men beinematerialdar qoiylǵan.
