Mádeniet jáne sport ministri sotqa bergen Eńlik Sydyqovanyń advokaty daýly oqiǵaǵa qatysty pikir bildirdi, - dep habarlaidy kaz.tengrinews.kz tilshisi. Taiaýda mádeniet jáne sport ministri Arystanbek Muhamediulynyń Eńlik Sydyqovany sotqa bergeni belgili boldy.
Qyzdyń advokaty Gúlnara Jýaspaeva onyń múddesin sotta tegin qorǵaýǵa kelisim berip otyr eken. Endi ol sotta qyzdyń aitqan sózderin dáleldeýge tyrysamyn deidi.
"Árine, qolymyzda kózir bar, ony sotta jariia etemiz. Oqiǵa tizbegin baqylap otyrsańyzdar, daý shyqqan kezde, ekinshi kúni men "eger ministr óz qyzmetinen ketpei, Eńlikpen sottasatyn bolsa, ádiletsiz sot bolady" dep aitqanmyn. Ol qazir Eńlikke tisin batyryp, sotta jeńip shyǵýy úshin barlyq ákimshilik quraldaryn qoldanyp jatyr", - dep málimdedi qyzdyń advokaty Gúlnara Jýaspaeva.
Sonymen qatar, advokat Eńlik Sydyqovaǵa jáne onyń týystaryna belgisiz adamdar qysym túsirip júrgenin, buǵan deiin ministrge taqqan aiyptaryn joqqa shyǵarýdy usynyp jatqanyn málimdedi. "Olardyń úiine birneshe ret baryp, Eńlikti Astanaǵa ushaqpen jetkizýdi usynypty, Astanaǵa jetkizip, olar Eńlikti videoúndeý jazǵyzyp, aqsha úshin jasadym degizgisi kelgen", - dep málimdedi advokat.
Advokat Jýaspaeva sotqa kýáger retinde Eńlik Sydyqovany qoldaýǵa daiyn adamdardyń shaqyrtylatynyn atap ótti. "Olar sotqa kelip, kýáger retinde sóz sóileýge, Eńlikti qoldaýǵa ýáde berdi. Qyzdar kóp, sotta qansha adam bolatynyn aita almaimyn, biraq kóp. Biz barlyq videony kórsetken joqpyz. Saqtai turýymyz kerek", - dep habarlady Eńlik Sydyqovanyń advokaty.
Al mádeniet jáne sport ministriniń advokaty Eskendir Álimbaev óz kezeginde eger Eńlik Sydyqova aiyptaýlaryn joqqa shyǵarsa, Muhamediuly aryzyn qaitaryp alýǵa daiyn ekenin atap ótti. "Shyntýaitynda ministr adamdy qylmystyq jaýapkershilikke tartýǵa nieti joq. Eger ol óz aiyptaýlaryn joqqa shyǵarsa, ministr aryzyn qaitaryp alýǵa daiyn. Jazalaýǵa nieti joq. Qyzdyń bir jaǵdailardyń qurbany bolǵanyn jaqsy túsinip otyrmyz, onyń aityp otyrǵan sózinde jasandylyq bar. Iaǵni ol oilaǵanyn aityp otyrǵan joq, aldyn ala daiyndalyp qoiǵan mátindi oqyp otyr. Soǵan qaraǵanda oǵan bireý osyny ait dep áser etken siiaqty. Túrli boljam aitýǵa bolady. Biraq bul qyzdyń belgisiz bir jaǵdailardyń qurbany bolýy múmkin ekendigin joqqa shyǵarmaidy", - dedi ministrdiń advokaty Tengrinews.kz tilshisine.
Onyń aitýynsha, ministr sotqa óz nietimen emes, memlekettik qyzmetker bolyp, óz abyroiyn qorǵaýǵa mindettelgen soń beripti.
"Ministr men Eńlik Sydyqova kezdespegen bolýy da múmkin. Sydyqova óz aiyptaýynda oqý ornyna túsý úshin rektormen kezdesýdi uiymdastyrýǵa onyń qabyldaý emtihanyna keshigip qalǵany sebep bolǵan deidi. Alaida, taiaýda BAQ-tarda jariia etilgen málimetterge qaraǵanda, Sydyqova 2011 jyly bul oqý ornyna túspegen. (...) 2011 jyly ol Qyzylordadaǵy basqa bir oqý ornyna túsken. Biraq videoúndeýinde ol Almatydaǵy oqý ornyna túskisi kelgenin aitady", - dep málimdedi Arystanbek Muhamediulynyń advokaty Eskendir Álimbaev.
Eske salaiyq, Osyǵan deiin T. Júrgenov atyndaǵy Qazaq ulttyq óner akademiiasynyń burynǵy stýdenti Eńlik Sydyqova ministrdi bóten oimen tiisti dep aiyptaǵan bolatyn. Videoda qyz 2011 jyly Muhamediuly rektor bolǵanda akademiiaǵa aqshaǵa túsirip beretinin aitty jáne ekiushty usynystar aitty dep málimdeidi. Al Muhamediuly óz kezeginde bul málimdemeniń shyndyqqa janaspaitynyn málimdegen. Osydan keiin BAQ-tarda taǵy bir qyzdyń ministri "tiisti" dep aiyptaǵany jaily habar tarady. Al keiin QR mádeniet jáne sport ministri Arystanbek Muhamediuly ar-namysy men abyroiyn sotta qorǵaityn bolatyny habarlandy.
