«Rejisser Talǵat Jánibekovti sotqa bergen Mádeniet jáne sport ministri Arystanbek Muhamediuly moraldyq ótemaqy retinde rejisserden 1 teńge tóleýdi talap etip otyr», — dep habarlaidy Ult.kz tilshisi.
Ministrdiń qorǵaýshysy Eskendir Álimbaevtiń aitýynsha, A.Muhamediulynyń talap-aryzy sotqa 19 shilde kúni ótkizilgen.
«Óziniń konstitýtsiialyq quqyǵyn paidalana otyryp, 2016 jyldyń 19 shildesinde Muhamediuly sotqa shaǵymdandy jáne óziniń ar-ojdany men iskerlik repýtatsiiasyn qorǵaýdy talap etti. Óz talabynda A.Muhamediuly buǵan deiin aitylǵan áńgimeni joqqa shyǵaryp, moraldyq zalal keltirgeni úshin aiyptalýshydan 1 teńge kóleminde simvolikalyq ótemaqy berýin talap etti», — deidi advokat.
E.Álimbaevtiń aitýynsha, Jánibekovtiń jariialaǵan beineúndeýinde Qazaqstan Respýblikasynyń biligine de kir keltirilgen. Ol bilik ókilderin A.Muhamediulynyń zańsyz áreketterine kóz juma qarap otyr dep aiyptaidy. «Jánibekov taratqan rolikte aitylǵan Qazaqstan Respýblikasynyń biligi, Mádeniet jáne aqparat ministri Arystanbek Muhamediuly týraly derekter shyndyqqa janaspaidy», — deidi Álimbaev.
Aita keteiik, daý 2015 jyldyń maýsymynda shyqqan edi. «Feniks» filmin túsirýshiler Qazaqstannyń Mádeniet jáne sport ministrligin túsirilim jumystaryn úzip tastady dep aiyptaǵan edi. Keiin olar Arystanbek Muhamediulyn reseilik-amerikalyq Aldamisa Entertainment kompaniiasymen birikken «Feniks» jobasy toqtap qalǵanyna bailanysty aiyptaǵan edi. Taiaýda rejisser Talǵat Jánibekov Muhamediuly bopsalaýmen ainalysty dep málimdep, video jariialaǵan bolatyn. Aitýynsha, ministr filmdi qarjylandyrý úshin aqsha suraǵan.
Eske salaiyq, osyǵan deiin ministrlik ókilderi rejisser men Muhamediulynyń arasynda shyqqan daýǵa qatysty pikir bildirgen bolatyn.
