Tanymal ánshi Dimash Qudaibergenniń ata-ájesiniń otaý qurǵanyna 50 jyl tolýyna orai ótken altyn toiǵa Qazaqstannyń mádeniet jáne sport ministri Arystanbek Muhamediuly men Aqtóbe oblysynyń ákimi Berdibek Saparbaev qonaq boldy, - dep habarlaidy Tengrinews.kz tilshisi.
Ministr bala Dimashty ata-ájesi Qudaibergen men Miýanyń úsh ailyq kezinen baýyryna basyp, tárbie bergenin aityp ótti.
"Dostarym, qazaq ónerin búkil álemge pash etip júrgen Dimashtyń ata-ájesi Qudaibergen aǵamyz men Miýa apamyz shańyraq qurǵandaryna jarty ǵasyr bolypty. Altyn toiǵa shaqyrý alǵasyn Aqtóbege arnaiy qurmetimizdi bildirýge keldik. Osydan elý jyl buryn Almatyda stýdent kezderinde bas qosqan ekeýi juptary jazylmai, úlgili otbasy bolyp, bala súiip, nemere qyzyǵyn kórip otyr. Ata-ájesi Dimashtyń ata-anasy stýdent bolǵasyn tuńǵysh nemerelerin úsh ailyǵynan baýyrlaryna basyp, ózderi ósirgen, onyń ónerli, tárbieli bolyp ósýine tikelei atsalysqan. Miýa apamyz Dimashty bes jasynda mýzyka mektebine ózi jetektep aparypty. Tuńǵysh nemereleriniń sońynan ergen on alty jasar Raýshan men on jastaǵy Ábilmansurdy ata-ájesiniń jaqsy kóretini sózsiz, biraq olar úshin Dimashtyń orny bólek", - dep jazdy Muhamediuly Facebook jelisindegi paraqshasynda.
Ministr toi ielerine uzaq ǵumyr men densaýlyq tiledi. "Muhtar Áýezovtiń "Ult bolamyn deseń, besigińdi túze" degen naqyl sózi bar. Dimash ata-ájesiniń túzý besiginde, boiyna ulttyq qundylyqtardy sińirip ósti. Qazaq tiliniń qainar bulaǵynan, ulttyq ónerdiń bastaýynan qanyp ishken Dimashtyń álemdik órkenietke tereń boilaǵany – otbasynyń tálim-tárbiesi, ónegesi. Mereitoi ielerin Altyn toilarymen shyn júrekten quttyqtap,myqty densaýlyq, uzaq ǵumyr tileimin. Elimizde osyndai úlgili, ónegeli, balany ulttyq salt-dástúr aiasynda tárbieleitin otbasylar, Dimashtai óner ieleri kóbeie bersin!", - dep jazdy ministr.
Al Qanat Aitbaev Instagram jelisindegi paraqshasynda ákesi men sheshesiniń 50 jyl buryn úilený toiynda túsken sýretin jariialady. "Elý jyl buryn. Əkem Qudaibergen men anam Miýanyń úilený toiynan estelik sýret. Almaty qalasy. 1968 jyl", - dep jazdy jeke muraǵat sýretin jariialaǵan ol.
Eske salaiyq, keshe ǵana Dimash Qudaibergen Qytaida taǵy bir syilyq jeńip alǵan edi. Ánshi Global Golden chart Awards marapatynda "Úzdik ərtis"atalymy boiynsha jeńiske jetti.
