Parlament Májilisiniń jalpy otyrysynda QR Mádeniet jáne sport ministri arheologtarǵa qoiylyp otyrǵan qatań talaptar týraly aityp berdi, dep habarlaidy "QazAqparat".
Aita keteiik, búgin Májiliste «Tarihi-mádeni mura obektilerin qorǵaý jáne paidalaný týraly» zań jobasy birinshi oqylymda maquldandy.
«Nege jańa ǵana oqý bitirgen jas azamat birden ózi jetekshi bolyp, litsenziia alýy kerek? Árine, biz ony toqtatýymyz kerek. Bul salada jii oryn alatyn qatelikter bar. Bizdiń arheologtar ydys-aiaq nemese altyn buiymdardy izdeidi. Kóbinese, kiimniń jáne adamnyń shashynyń quramy nazardan tys qalady. Al adam ómirin zerttegende qundy málimetter osy shashtan alynady. Sol sebepten arheologtardyń aldyna tiisti talaptardy tótesinen qoiyp otyrmyz», - dedi ministr jalpy otyrys kezinde qoiylǵan saýalǵa jaýap bere otyryp.
Onyń sózine qaraǵanda, arheologiialyq litsenziiany alý úshin mamanda mindetti túrde 5 jyldyq tájiribesi, ǵylymi dárejesi, eńbegi bolýy kerek. Bul talap búginde óte qajet bolyp tur.
Bul máselede A. Muhamediuly zań jobasynda arheologiialyq jáne ǵylymi-restavratsiialaý jumystaryn litsenziialandyrý máselesine bólek nazar aýdarylǵanyn atap ótti.
«Tájiribe kórsetkendei, bir adamnyń ár óńirde bir mezette ártúrli obektilerge jetekshilik etýi tarih jáne mádeniet eskertkishteriniń jai-kúiine teris yqpalyn tigizedi. Budan ózge, sol adamdy tartý arqyly arheologiia, ǵylymi-restavratsiialaý jumystaryna litsenziiaǵa ótinim berýshi uiym bul salada múldem tájiribesi joq bola otyryp, ǵylymi jetekshilik jasaityn tulǵanyń tájiribesin óz tájiribesi retinde usynady. Osy oraida, kóptegen jaǵdailarda arheologiialyq jáne ǵylymi-restavratsiialaý jumystarymen eshqandai tájiribesi men bilimi joq, diletant uiymdar ainalysa beredi. Bul tarih jáne mádeniet eskertkishteriniń tarihi kelbetin buzý, erekshelenetin elementterin joiýǵa ákelip jatady», - dedi ministr.
