Muqaǵali 1970-jyly jazda qatty aýyrdy. Aýyrsa da, Jazýshylar odaǵyna jumysqa baryp júrdi. Jumeken Nájimedenov ekeýi birge isteitin.
Jumekennen birde: "Muqaǵali qatty aýyryp júr, jumysta qalai shydap otyrady?" — dep suradym. Jumeken: "Keshke deiin otyrady, eshkimmen sóilespeidi, ózimen-ózi" — dedi.
Úide de kóp úndemeidi. Apamyz aýyldan kelgen. Muqaǵali jumystan oralǵan soń tamaqqa da qaramaidy, eshteńe jazbaidy, oqymaidy da, sondai bir úndemestik shaqqa kóshkendei. Ózim úi-ishine bildirmesem de, ishtei qatty qorqyp júrdim.
Sol kúni Muqań erte jatyp qalǵan edi. Balalarǵa tamaq berip, jatqyzyp, jatyn bólmege kirsem, ol uiyqtap jatyr eken. Anany-mynany oilap uiqym kelmedi. Túnniń jarymy boldy-aý deimin. Bir ýaqytta ol aiqailap shoshyp oiandy. Men de ushyp turyp jaryqty jaǵyp jiberdim. Ózi sup-sur, terlep ketken. Oiana salyp shoshyǵanyn bilip, aiat oqyp ketti. Jaryq janǵan soń, balalarmen birge jatqan apam da keldi.
— Ne boldy, ne boldy, nege shoshyp oiandyń? — dep ekeýmiz eki jaqtan surap jatyrmyz. Shóldep qaldy ma dep ashyǵan kóje ákep berdim. Sony ishti de biraz otyryp:
— Qatty uiyqtap ketippin. Janyma aqqa oranǵan bireý keldi de: "Balalaryńnyń bireýin qurbandyqqa ber, olaryńdy qimasań, óziń júr!" — dep silkilep jatyr. Sodan shoshyp oiandym, Naqa. Qorqyp turmyn! — dedi óńi qashyp.
Ary qarai ne isterin bilmegen, daǵdarǵan qalpymen melshiip otyryp qaldy. Bárimiz de osy tústen shoshyp, úrpiisip, boldyq ta qaldyq. Sóilerge dármen joq.
Ómirde joqshylyqtyń neshe túrin kórgen apam baiǵus kóńili óte bos adam.
— Sabyr et, Muqaǵaliym, Muqashym, balalaryń jas qoi, qurbandyq dese men-aq baraiyn, jasym keldi ǵoi, qaraǵym. Seniń de, balalaryńnyń da sadaǵasy bolsam, armanym joq! — dep jylap jiberdi. Men de jyladym. Muqań da ózin-ózi toqtata almai bosap ketti.
Jary - Lashyn Ázimjanovanyń esteliginen
