Belgili qazaqstandyq rejisser Bolat Qalymbetov túsirgen «Muqaǵali» kórkem filmi Úndistanda naýryzdyń 18-25 aralyǵynda ótetin 26-shy Halyqaralyq Kerala kinofestivaliniń «Álemdik kino» baǵdarlamasy sheńberinde kórsetiledi. Bul týraly «Qazaqfilm» kinostýdiianyń baspasóz qyzmeti málim etti, dep habarlaidy QazAqparat.
Atalǵan baiqaýda Berlin jáne Kann syndy basqa da álemdegi bedeldi festivalderde júldelerge ie bolǵan filmder usynylady.
Eske salaiyq, QR Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ túsirgen «Muqaǵali» filmi qazaqtyń aqiyq aqyny Muqaǵali Maqataev ómiriniń sońǵy jyldary týraly baiandaidy.
Filmniń álemdik tusaýkeseri Tallindegi «A» sanatyndaǵy 25-shi Halyqaralyq «Temnye nochi» (PÖFF) kinofestivali sheńberinde ótti. Baiqaýdyń negizgi baǵdarlamasyna qatysqan otandyq kinotýyndy ekýmenikalyq qazylar alqasynyń arnaiy júldesine ie boldy.
Byltyr qazan aiynda biografiialyq drama elimizde prokatqa shyǵyp, kórermenniń ystyq yqylasyna ie bolǵan.
Kerala halyqaralyq kinofestivali Úndistanda ótetin eń iri ári bedeldi baiqaýlardyń biri. Mádeni is-shara Kerala shtatynyń mádeniet departamenti uiymdastyrýymen jyl saiyn jeltoqsan aiynda ótkiziledi.
Biylǵy festival Covid-19 pandemiiasyna bailanysty naýryz aiyna aýystyrylyp, dástúrli formatta ótkiziletin bolady. Festival sheńberinde barlyǵy 180 film kórsetiledi.
