Sýret ashyq derekkózden alyndy
Rejisser Bolat Qalymbetovtiń "Muqaǵali" kórkem filmi SAFF kinofestivalinde Gran-pri júldesin jeńip aldy, dep habarlaidy Massaget.kz portaly.
Belgili qazaq aqyny Muqaǵali Maqataevtyń 90 jyldyǵyna arnalǵan "Muqaǵali" kartinasy onyń ómiriniń sońǵy jyldary týraly baiandaidy. Filmdi QR Mádeniet jáne sport ministrliginiń tapsyrysy boiynsha Sh.Aimanov atyndaǵy "Qazaqfilm" kinostýdiiasy túsirgen. Ol qazaqstandyq prokatqa 2021 jyldyń 21 qazanynda shyqqan bolatyn.
Filmniń álemdik premerasy 25-shi (PÖFF) Tallin kinofestivali aiasynda ótti, onda qazaqstandyq kartina ekýmenikalyq qazylar alqasynyń júldesine ie boldy.
Kinotýyndynyń stsenariiin belgili jazýshy Júsipbek Qorǵasbek, Bolat Qalymbetov jáne Ǵaziz Nasyrov jazǵan. Rejisser bul filmge 13 jyldan asa daiyndalǵanyn aitady.
"Muqaǵali – qazaqtyń maqtanyshy. Ol poeziiany taǵy bir shyńǵa kótergen aqyn. Onyń taǵdyry da ońai bolǵan joq. Talai synaqtarǵa tótep berdi, Synbady, tize búkpedi. Onyń jyrlarymen bala kezimnen tanyspyn. Keide qinalǵanda aqyn jyrlaryn qaitalap oqimyn. Bul maǵan kómektesedi. 13 jyldan asa daiyndaldym. Sońynda film túsirý kerek dep sheshtim. Osy ýaqyt aralyǵynda aqyn týraly málimetter jinadym, kózin kórgen adamdarmen kezdestim", - dedi kartinanyń rejisseri Bolat Qalymbetov.
Film oqiǵalary ótken ǵasyrdyń 60-70 jyldaryn sýretteidi. Sondyqtan Ermek Ótegenov bastaǵan sýretshiler tobynyń da eńbegi zor. Olar sol ýaqyttyń beinesin jinap, turmysyn, infraqurylymyn dál kórsetken. Filmniń qoiýshy operatory - Edige Núsipbekov.
2019 jyly "Muqaǵali" filminiń túsirilimi bastalǵany týraly habarlanǵan bolatyn. Rejisser kinoǵa qajetti Almatynyń sol kezdegi qalpyn tabý ońaiǵa soqpaǵanyn aitady. Túsirilim toby búkil Qazaqstandy aralap, aqyr sońynda Eski Almatyny beineleitin, kósheler men úileri jaqsy saqtalǵan Óskemen qalasyna toqtaǵan. Odan bólek túsirilim Almaty, Peterbor qalasy men Almaty oblysynda ótken.
Jalpy, "Muqaǵali" filmi bir jyl ishinde 10 halyqaralyq marapatqa ie boldy.
Aita keteiik, Sent-Endriýs kinofestivali (SAFF) - halyqaralyq kinofestival jáne shotlandiialyq qaiyrymdylyq uiymy.
