2021 jyly múgedektigi bar adamdarǵa beriletin áleýmettik tólemderge jáne ońaltýdyń tehnikalyq quraldary men qyzmetterin usynýǵa 486 mlrd teńge qarastyrylǵan. Bul týraly halyqqa esep berý kezdesýinde QR Eńbek jáne halyqty áleýmettik qorǵaý ministri Serik Shápkenov aitty, dep habarlaidy QazAqparat.
«2020 jyly ministrlik múgedektigi bar adamdardy áleýmettik qorǵaýdy jaqsartýǵa baǵyttalǵan normalary bar zań jobasyn ázirledi. Atap aitqanda, múgedektik sebebine qaramastan I toptaǵy múgedektik kútimine járdemaqy engizý; 7 jastan 16 jasqa deiingi balalardy múgedektik toptary boiynsha járdemaqy mólsherin qaita qarai otyryp bólý; Múgedektigi boiynsha jáne asyraýshysynan airylý jaǵdaiyna járdemaqylardy bir mezgilde alý quqyǵyn berý; kámeletke tolǵan múgedek balalardy tárbielep otyrǵan otbasylar úshin turǵyn úi kezegin saqtaý jáne basqa da normalar. Osy zań biyl qabyldanady dep kútilýde, zań jobasy Májiliste maquldandy», - dep atap ótti ministr.
Múgedektigi bar balalardy ońaltý qyzmetterimen qamtamasyz etý úshin jergilikti atqarýshy organdarmen birlesip shaǵyn ońaltý ortalyqtaryn ashý jumystary júrip jatyr. Biyl 12 ortalyq ashylady, qazir onyń altaýy jumys istep tur.
«Múmkindigi shekteýli jandarǵa meditsinalyq-áleýmettik saraptama júrgizý rásimi men merzimin ońtailandyrý maqsatynda biz múgedektikti syrttai belgileýdi engizý boiynsha jumys istep jatyrmyz. 1 shildeden bastap joba 6 óńirde, Nur-Sultan, Almaty qalalarynda, Batys Qazaqstan, Soltústik Qazaqstan, Aqmola jáne Qaraǵandy oblystarynda iske qosyla bastaidy. Jobany júzege asyrý keleshekte múgedektigi bar adamdardyń quzyrly mekemelerge qaita-qaita barýyn jáne qyzmet kórsetýshimen tikelei bailanysyn boldyrmaýǵa múmkindik beredi», – dep naqtylady Eńbek ministri.
