Múgedektigi jáne asyraýshysynan aiyrylý jaǵdaiy boiynsha járdemaqylar bir mezgilde berilmek.
Bul týraly Parlament Májilisiniń jalpy otyrysynda azamattardyń jekelegen sanattaryn áleýmettik qorǵaý máseleleri boiynsha zań jobasyn talqylaý kezinde QR Eńbek jáne halyqty áleýmettik qorǵaý ministri Serik Shápkenov málim etti, dep habarlaidy QazAqparat.
«Zań jobasynda múgedektigi jáne asyraýshysynan aiyrylý jaǵdaiy boiynsha járdemaqylardy bir mezgilde alý quqyǵyn berý kózdeledi. Bul asyraýshysynan aiyrylǵan jáne quramynda múgedekar balalary bar otbasylardyń tabys deńgeiin arttyrýǵa múmkindik beredi», - dedi S. Shápkenov.
Onyń aitýynsha, qazirgi ýaqytta múgedektigi bar bala ata-analary ajyrasqan kezde bir mezgilde alimentter men múgedektigi boiynsha járdemaqy ala alady. Alaida, ata-anasynyń (asyraýshy) biri nemese ekeýi de qaitys bolǵan jaǵdaida, bala tek múgedektigi boiynsha járdemaqy nemese asyraýshysynan aiyrylý boiynsha járdemaqy alady.
«Járdemaqynyń eki túrin bir mezgilde taǵaiyndaý ata-anasynan aiyrylǵan balalarǵa qatysty kemsitetin normany alyp tastaýǵa múmkindik beredi. Osy norma engizilgen jaǵdaida 2 myńnan astam bala múgedektigi boiynsha járdemaqymen qatar (mólsheri 41 163 – ten 48 023 teńgege deiin), asyraýshysynan aiyrylý jaǵdaiy boiynsha járdemaqyny ala alady (mólsheri 12 063-ten 29 500 teńgege deiin)», – dep túsindirdi ministr.
