Qazaqstan Respýblikasy Eńbek jáne halyqty áleýmettik qorǵaý ministrligi múgedektigi bar adamdarǵa jeke kómekshiler usynatyn qyzmetterdi jetkizýshini óz betinshe tańdaý múmkindigin berý máselesin qarastyrýda.
Bul týraly Eńbek jáne halyqty áleýmettik qorǵaý ministrliginiń resmi saitynan málim boldy.
Qoldanystaǵy erejelerge sáikes jeke kómekshilerdiń qyzmetteri úkimettik emes uiymdar arqyly nemese jeke kómekshiler men jumyspen qamtýdyń óńirlik basqarmalary arasynda tikelei kelisim jasasý arqyly kórsetilýi múmkin.
Elimizdiń kóptegen aimaqtarynda bul qyzmetter uiymdastyrýshylyq jáne aqparattyq fýnktsiialardy júzege asyratyn ÚEU arqyly kórsetiledi.
Alaida, jekelegen ÚEU jumysynyń sapasy múgedektigi bar adamdar tarapynan synǵa túsedi. Olardyń aitýynsha, ÚEU kelisimsharttyq mindettemelerdi adal oryndamaidy, ákimshilik shyǵyndarǵa qarajattyń 10%-yn ustap qalady jáne qyzmet kórsetý tizbegindegi qosymsha býyn bolyp tabylady.
«Qazirgi ýaqytta oblys ákimdikteri qyzmet alýshylarǵa olar úshin qai ádis qolaily ekenin anyqtaý maqsatynda saýalnama júrgizýde. Aldyn-ala málimetter boiynsha, múgedektigi bar adamdardyń kópshiligi jumyspen qamtý bólimderimen tikelei jumys jasaý týraly usynysty qoldaidy. Sondyqtan biz jeke kómekshilerge qyzmet kórsetýdiń qoldanystaǵy erejelerine túzetýler engizýdi josparlap otyrmyz jáne 2020 jyldyń qańtarynan bastap múgedektigi bar adamarǵa osy qyzmetterdi alý tásilin tańdaýǵa múmkindik beremiz», - dedi QR Eńbek jáne halyqty áleýmettik qorǵaý vitse-ministri Erlan Áýkenov.
Aita ketý kerek, Qazaqstanda birinshi toptaǵy múgedekterdiń sany 24 myńnan asady, olar jeke kómekshilerdiń qyzmetin alady. Bul qyzmetter múgedekterdiń quqyqtary týraly konventsiiaǵa sáikes múgedektigi bar adamdardy qoǵamǵa qosý jáne integratsiialaý maqsatynda usynylady. Jeke kómekshilerdiń qyzmetterine múgedektigi bar adamdy jumysqa, bilim berý mekemelerine, memlekettik, áleýmettik, meditsinalyq jáne basqa obektilerge barǵan kezde alyp júrý kiredi.
