Senatta múgedektigi bar azamattardyń quqyqtaryn qamtamasyz etý jáne ómir sapasyn jaqsartý boiynsha usynystar ázirleýge bailanysty jumys tobynyń qorytyndy otyrysy ótti, dep habarlaidy "Ult aqparat".
«Senator Nariman Tóreǵalievtiń tóraǵalyq etýimen 2,5 aidyń ishinde toptyń 6 otyrysy, 2 tyńdaýy ótti. Osy kezeńde barlyǵy 80 usynys aityldy. Saralaý barysynda keibir usynystar alynyp tastalyp, keibiri pysyqtaýdy qajet etetini aityldy. Ýákiletti organdar qalǵan usynystardy 2020 jyly zań shyǵarý qyzmeti aiasynda qaraityn bolady», - delingen palatanyń baspasóz málimetinde.
Jumys qorytyndysy boiynsha elimizde ońaltý ortalyqtary jetispeitini jáne erekshe qajettilikteri bar balalardy diagnostikadan erte ótkizý tártibi tolyq engizilmegeni anyqtaldy. Múgedek balalardyń qorshaǵan ortada kedergisiz júrip-turýy jáne bilim alýǵa qol jetkizý múmkindikteri ózekti máselelerdiń biri bolyp otyr.
«Talqylaý qorytyndysy boiynsha ortalyq jáne jergilikti memlekettik organdar arasyndaǵy mekemearalyq ózara bailanystyń bolmaýynan júieli sipattaǵy kúrdeli máselelerdiń oryn alǵany anyqtaldy. Jumys toby zań shyǵarý bastamalaryn ilgeriletý jónindegi únqatysý alańyna ainaldy. Múgedek jandardyń quqyqtaryn qorǵaý jónindegi Biryńǵai ulttyq úilestirýshi jáne keńesshi organ qurýdy usynamyz», - dedi N.Tóreǵaliev.
Top quramynda Parlament Senatynyń depýtattary, ortalyq jáne jergilikti atqarýshy organdardyń ókilderi, áleýmettik jáne bilim berý salasyndaǵy memlekettik mekemelerdiń basshylary, sonymen qatar memlekettik emes uiymdardyń ókilderi men múmkindigi shekteýli adamdar bar.
