Eńbek jáne halyqty áleýmettik qoldaý vitse-ministri Nariman Muqyshev múgedek jandar úshin paidaly málimetteri mol inva.gov.kz portalynyń múmkindikterimen tanystyrdy, dep habarlaidy "Ult aqparat".
«Azamattardyń kóbi memleket tarapynan qandai qoldaýǵa ie ekenin bilmei jatady. Keide ashyq aqparat kózderinde ol jaily málimet te az bolýy múmkin. Keide ereje, zańnyń bári kúrdeli zańnamalyq tilde jazylyp, aqparatty túsiný qiynǵa soǵady. Biz osy máseleni tereń taldai kele, qyzmetter jaily aqparatty qarapaiym tilmen jetkizýdi jón dep sheshtik. Birinshi kezekte bul erekshe qajettiligi bar azamattarǵa qatysty», - dep jazady Nariman Muqyshev Facebook-tegi paraqshasynda.
Vitse-ministrdiń habarlaýynsha, inva.gov.kz portalynda azamattardyń sanaty boiynsha paidaly aqparattar barshylyq. Ol jerde múgedekterdiń quqyǵy týraly konventsiia, erekshe qajettiligi bar adamdardyń ómirin jaqsartýǵa arnalǵan ulttyq jospar, jobalar, ÚEU jaily málimet kóp. Onda sonymen qatar qandai qalada qandai nysandar múmkindigi shekteýli jandar úshin qoljetimdi ekenin kórsetetin karta da bar.
«Memlekettik qyzmetter týraly aitar bolsaq, biz munda qarapaiym ári túsinikti lending qurý týraly sheshimge keldik. Ony qaidan alýǵa, qandai qujattar kerektigi, qansha ýaqyt alatyny týraly barlyq aqparat bar. Lendingti qaidan tabýǵa bolady? Basty paraqshada «Múgedektigi bar adamdarǵa áleýmettik jáne memlekettik qyzmet kórsetý, ońaltý» degen banner bar. Onyń astynda «tolyǵyryq bilý» degen túimeshe tur. Oǵan basý arqyly úsh bólimdi paraqshaǵa enesiz. Qyzmetter jaily bilgińiz kelse «Memqyzmetter» aidaryn basý kerek. Ol jerde sizdi qandai taqyryp oilandyratyny jaily (múgedektikti belgileý, ońaltý, tólem men járdemaqy) aqparat barshylyq. Qajetti pýnkti tańdaý arqyly qajetti qyzmetterdiń bári de sizge qoljetimdi bolady. Álbette biz bul jumysty ary qarai da jalǵastyramyz. Aldaǵy ýaqytta azamattardyń barlyq sanatyna qatysty aqparat dál osylai qoljetimdi ári túsinikti bolar degen senimdemiz», - dedi ol.
