QR Eńbek jáne halyqty áleýmettik qorǵaý ministrligi Shykenttegi áleýmettik ortalyqta I toptaǵy múgedek qyzynyń zorlanyp kelgenin aitqan ananyń shaǵymynan keiin atalmysh mekemege jospardan tys tekseris jasaidy, dep habarlaidy "Ult aqparat".
«QR Eńbek jáne halyqty áleýmettik qorǵaý ministrliginiń bastamasymen Shymkent qalasy ákimdiginiń «№2 arnaýly áleýmettik qyzmet kórsetý ortalyǵy» KMM-de arnaýly áleýmettik qyzmetterdiń sapasyn tekserý maqsatynda monitoringilik top qurylady.
Monitoringilik toptyń quramyna beiindi memlekettik jáne jergilikti atqarýshy organdardyń, qoǵamdyq birlestikterdiń jáne ózgelerdiń ókilderi kiredi.
Komissiia qamqorlyqqa alynǵandarǵa qatysty turý, tamaqtaný, tósek-oryn jabdyqtarymen, kiimmen jáne mindetti gigienalyq quraldarmen qamtamasyz etilý jónindegi standarttardyń saqtalýyn, sondai-aq kórsetiletin áleýmettik-meditsinalyq qyzmetterdiń sapasyn tekseredi.
Shymkent qalasynyń turǵyny Áliia Mamýtovanyń Instagram-pabligindegi úndeýhaty tekserý júrgizýge negiz boldy. Áiel I toptaǵy múgedek qyzy mekemede 7 jyl boiy zorlanǵanyn habarlady. Onyń aitýynsha, qyzy esinen tanyp qalǵan kezde ony paidalanǵan, qyz epilepsiiadan zardap shegedi», - delingen Eńbek ministrliginiń aqparatynda.
Aita keteiik, qazirgi ýaqytta atalǵan fakti boiynsha QR QK-niń «Birneshe ret jasalǵan zorlaý» baby boiynsha sotqa deiingi tergeý jumystary júrgizilýde.
Vedomstvodan málim etkendei, tekserý nátijeleri týraly qosymsha habarlanatyn bolady.
