«Qazaqstan Respýblikasynyń keibir zańnamalyq áktilerine turǵyn úi saiasatyn reformalaý máseleleri boiynsha ózgerister men tolyqtyrýlar engizý týraly» Zań jobasynda múgedek balalardy tárbielep otyrǵan otbasylar úshin turǵyn úi bólý kezinde qosymsha bólme bólý kózdelgen, dep habarlaidy QazAqparat.
Bul týraly Zań jobasyn QR Parlamenti Májilisinde tanystyrǵan QR Indýstriia jáne infraqurylymdyq damý vitse-ministri Erkebulan Daýylbaev málim etti.
«Joǵaryda aitylǵandai, turǵyn úi alý úshin qandai da bir sanatqa jatatynyna qaramastan, turǵyn úige muqtaj kez kelgen QR azamaty esepke tura alady.
Sondai-aq, balalary kámeletke tolǵan ne olar qaitys bolǵan jaǵdaida, kóp balaly otbasylar jáne tolyq emes otbasylar úshin kezektilikti saqtaý jónindegi sharalar kózdelgen.
Soltústik óńirlerge qonys aýdarǵan jaǵdaida qandastar kezekten shyǵarylmaityn bolady. Memlekettik nemese qoǵamdyq mindetterdi oryndaý, sondai-aq, adam ómirin qutqarý kezinde qaza tapqan azamattardy qurmetteý maqsatynda, osyndai adamdardyń otbasylaryn jergilikti atqarýshy organdarmen 1 jyldan keshiktirmei turǵyn úimen qamtamasyz etý usynylady», - dedi Erkebulan Daýylbaev.
Al múgedek balalardy tárbielep otyrǵan otbasylar úshin turǵyn úidi bólý kezinde qosymsha bólme bólý kózdelgen.
«Otbasy bankine» kezekte turǵandar bazasyn júrgizý boiynsha memlekettik fýnktsiialardy berýge bailanysty derbes derekterdiń qaýipsizdigi máselesi týyndaidy.
Osyǵan bailanysty kezekte turǵandardyń derbes derekteriniń saqtalýy, qaýipsizdigi jáne qorǵalýy Qazaqstan Respýblikasynyń zańnamalyq aktilerine sáikes júzege asyrylatyn bolady.
Kezektilikti esepke alý úshin «Otbasy banki» ázirleitin aqparattyq júie memlekettik tehnikalyq qyzmette jyl saiynǵy attestattaýdan jáne synaqtan ótetin bolady.
Derbes derekterdi jinaýǵa jáne óńdeýge kelisim zańnamaǵa jáne Tsifrlyq damý, innovatsiialar jáne aeroǵarysh ónerkásibi ministrliginiń «Derbes derekterge qoljetimdilikti baqylaý servisine» sáikes turǵyn úige muqtaj azamattarmen usynylatyn bolady», - dedi vitse-ministr.
