«Búgin 29 tamyzda balalarymyz Qazaqstan Resýblikasynyń Prezidenti men Astana qalasynyń ákimdigine arnalǵan kontsertke qatysýǵa shaqyrylǵan edi. Balalar arnaiy daiyndyqtarǵa qatysyp júrdi, olar da basqalardai osyndai saltanatty is-sharaǵa qatysamyz dep qýanyp, búgin erte turyp, ádemi kontsertke arnalǵan kóilekterin kiip, boianyp, kontsert ótetin alańǵa kelip edik. Balaqailar dalada turyp, bilerine daiyndalyp turǵan edi uiymdastyrýshylar: «múgedek arbada otyrǵan balalar Prezident pen ákimniń kózine kórinbesin», - dep balalarymyzdy sharaǵa qatystyrmai, qaitaryp jiberdi. Múmkindigi shekteýli balalardy bizdiń elde nege kemsitedi eken?! Olar óleń aityp, bilep talai sharaǵa qatysqan, arbada otyryp bi bileý chempionattarynan birinshi oryndar alǵan balalar edi. Men 13 jyl shetelde turǵan adammyn, elim jaily árqashanda tek maqtanyshpen aityp júretinmin, biraq qazir yzadan jarylaiyn dep turmyn! Sheteldegi múmkindigi shekteýli adamdarǵa degen qarym-qatynasqa Qazaqstanǵa jetý qalai alys deseńshi... Búgin bizdiń balalardy «Shabyt» ýniversitetine tyǵyp qoidy, basqa balalar men eresek adamdardyń óner kórsetýleri aiaqtalǵansha biz ýniversitet ashanasynda kezegimizdi kútýmen boldyq, biraq bizdi eshkim shaqyrmady, sebebi Prezident pen ákim bizdiń arbaǵa tańylǵan balalarymyzdy kórgisi kelmeidi eken!!! Elimizge qandai masqara!!!», - dep feisbýk áleýmettik jelisinde Aida Kolpakova esimdi áiel óziniń jeke paraqshasynda jazǵan eken.
Aidamen habarlasyp mán-jaidy suraǵan edim. «Uiymdastyrýshylar bizge saǵat 14.30-da aldyn-ala kelisilgen orynda óz shyǵýlaryńdy kútińder dep aityp qoiǵan edi, Saltanat, Aigúl esimdi analar bir-bir arbada otyrǵan balalarymyzben orynymyzda otyrǵan edik, kenetten qasymyzǵa qaýipsizdik qyzmetinen bir adam keldi, álgi adam «bul jerde ne istep otyrsyzdar?» dep bizge til qatty. Biz ol kisige osy sharaǵa qatysatynymyzdy, ónerimizdi kórsetý kezegimizdi kútip otyrǵanymyzdy aittyq. Sharaǵa Elbasy qatysqandyqtan, qaýipsizdik qyzmeti júretinin bilemiz. Olar bizge bul jerden aryraq ketýimizdi talap etti, keiin olar bir-birimen ratsiia arqyly sóilesti, sosyn qaýipsizdik qyzmetiniń bastyǵy bizdiń qasymyzǵa keldi. Sol kezde biz uiymdastyrýshylardyń qasynda turǵan edik. «Bular mynda ne istep júr?! Prezident sharadan ketkennen keiin ǵana kimdi shyǵarsandar da óz erkilerin», dep sózin bizge qaratyp, asa dórekilikpen ákireńdedi. Sol jerde qaýipsizdik qyzmetiniń adamdary uiymdastyrýshylarǵa «osynda múgedekter bolatynyn nege aldyn ala eskertpendińder», - dep aiqalap jatty. Bizge «Shabyt» ýniversitetine baryp otyrsyn dep, kontsert ótip jatqan jerden shyǵaryp jiberdi. Biz uiymdastyrýshylardan «bular kim?» - dep suraǵanda olar «ákimdiktiń adamdary» - dep jaýap berdi.
Biz ashanada kútip otyrdyq, bizdi eshkimde shaqyrmady, keiin ózimiz habarlasqanda ǵana esterine tústik, balalarymyzben sahnaǵa júgirip barǵanda, barlyǵy tarap ketipti, tek uiymdastyrýshylar ǵana júr eken. Balapandarymyzdyń kóńil-kúileri qatty túsip ketti, qanshama osy kontsertke daiyndalǵanbyz, tańerten ádemi kiindirip, balalarymyzdy alyp kelgen edik... Qyzym osy oqiǵadan keiin: «Anashym, biz basqamyz ba? Sizder siiaqty emespiz be?», - dep surady. Qaiteiin, júregim qatty aýyryp ketti, keiin uiymdastyrýshylar keshirim surap, balalarymyzǵa shokolad usyndy, balam almai bas tartty. Elge búgingi keleńsiz oqiǵaǵa tap bolǵan qyzymnyń ótinishimen qaityp oralǵan edik, endi ne qýanarymdy ne jylarymdy bilmeimin...
Saltanat esimdi ana: «Áketińder bulardy!» dep buiryq berip jatqan Prezidenttiń qaýipsizdik qyzmeti adamynyń sózin óz qulaǵymmen estidim. Balalarymyz sýyq kúnderge qaramai daiyndyqqa qatysyp júrdi. Qyzym menen: «Búgin sonda daiyndyq pa bolǵan?» - dep surady. Men ne dep jaýap qatarymdy bilmei qaldym. Uiymdastyrýshylardyń «Biz ártúrlimiz, biraq teńbiz» - dep kórsetkileri kelgenderi osy ma edi?!.
Qymbat Kereibai
Astana qalasy
