Ózine ǵana emes, ózgelerge de qol ushyn sozý. I top múgedegi Erlan Ádilbekov osyndai joldy tańdaǵan. Ol omyrtqa zaqymyn, insýlt alǵan jáne sal aýrýyna shaldyqqan adamdardy ońaltý jumystarymen ainalysady.
Erlan Ádilbekov 2019 jyly maýsym aiynda «Start» sporttyq-saýyqtyrý ortalyǵyn ashqan.
«2018 jyly bul ortalyqty úsh aiǵa pilottyq rejimde ashyp, qalai jumys isteý kerek ekenin túsinip aldyq. Ózim de osy joldan ótkendikten, saýyqtyrý jumystaryna qatysty úlken tájiribem bar. Jańa jylǵa deiin 20-ǵa jýyq adam ortalyqta em aldy. Em alýshylardyń keibiriniń janynda kútýshileri boldy. Bul ortalyqty tolyqtai óz qarajatyma ashyp, tósek-oryn, stol, oryndyq jáne sport tehnikalarymen jabdyqtadym. Elimizde 12 kún ǵana ońaltý jumysyn júrgizetin ortalyqtar kóp, biraq 12 kún em alýdyń esh máni joq. Tolyq emdelý úshin turaqty túrde emdik fizikalyq shynyǵýmen ainalysý kerek», - deidi ońaltý ortalyǵynyń basshysy.
Erlan Ádilbekov Semei qalasynda ómirge kelip, 2013 jyly elordaǵa kóship kelgen.
2002 jyly ol ózende júzip júrgende moiyn omyrtqasyn syndyryp alǵan. Sonyń saldarynan eki aiaǵy men eki qoly tolyq sal bolyp qalǵan. Qiyn sátte Erlan aǵaǵa otbasy tireý bolǵan. Onyń baýyry sol oqiǵadan beri aǵasynyń qasynan tabylyp, qoldaý bildirip keledi.
«Qaiǵyly jaǵdaidan keiin alǵashqy alty jyl boiy tósek tartyp jattym. Sol kezde múgedekter arbasyna otyrýdy armandap, elordaǵa ketýdi maqsat ettim. Maqsatyma jetý úshin «Programmist-tehnik» mamandyǵy boiynsha eki jarym jyl kolledjde qashyqtyqtan oqyp, diplom aldym. Odan keiin elektrondy úkimette jumys istep, jeke kásipker bolyp, memlekettik satyp alý jáne tendermen ainalystym», - deidi ol.
Ýaqyt óte kele ol óz tájiribesin bólisý maqsatynda ońaltý ortalyǵyn ashý týraly sheshim qabyldaidy. Bul ortalyqta ońaltý jumystarymen ainalysyp qana qoimai, orta jáne joǵary oqý ornyna túsýge kómeýtesip, treningter ótkizip, jergilikti atqarýshy organdarmen birlese otyryp jumysqa ornalasýǵa kómektesedi.
Atalǵan ortalyqta jattyǵý zaly, massajǵa arnalǵan bólme, kir jýatyn, tamaq isteitin jáne uiyqtaityn bólme bar.
«Tańerteń ortalyqta jatqan adamdar emdik dene shynyqtyrýmen ainalysady. Kúnine eki ret nusqaýshymen birge jekelei jumys júrgiziledi. Ortalyǵymyzǵa Pavlodar, Ekibastuz, Qyzylorda, Aqtaý, Atyraý, Semei, Almaty, Balqash, Kókshetaý, Qaraǵandydan kelip emdeledi. Kóbine omyrtqa zaqymy, sal aýrýy jáne insýlt diagnozy boiynsha keledi. Mysaly, i nsýlt alǵan adamdy jattyǵý zalyna almaidy. Olardyń denesiniń bir jaq bóligi jansyzdanyp qalatyndyqtan, árqaisysymen erekshelikterine qarai jekelei jumys isteimiz. Bizge kóbine aýrýhanadan em alyp bolǵan, endigi emdik dene shynyqtyrýdy qajet etetin adamdar keledi. Aiyna 120 myń teńge tóleidi, oǵan ortalyqta turý men tamaqtanýy kiredi», - deidi Erjan Ádilbekov.
Ol etken eńbegi jemisin bere bastaǵanyn aitty.
«Mysal retinde aitar bolsam, bizge Almatydan bir áiel keldi. Ol eki ret insýlt alǵan, múgedekter arbasynda otyrdy. Biz ony tórt ai ishinde aiaqqa turǵyzdyq. Ol arnaiy tirek arqyly óz betimen qozǵalyp, júre alady. Jaqynda ǵana ony Almatyǵa shyǵaryp saldyq, endi bir aidan keiin tolyq emdelý úshin qaita keledi. Taǵy bir mysal, 21 jastaǵy bozbala qoly tolyq jansyzdanǵan kúide keldi. Bizdiń ortalyqtaǵy nusqaýshylardyń arqasynda ol úsh ai ishinde qolyn qozǵalta alatyn dárejege jetti», - deidi ol.
Olar úshin basty nárse - nátije.
«Bizge tehnikalyq jaǵynan kómekteskender, jihaz syilaǵandar boldy. Jumys istei bastaǵan 6 ai ishinde elimizde mundai ortalyq qajet ekeni aiqyndaldy. Ol densaýlyq jaǵdaiyna bailanysty kómekke muqtaj adamdardyń ómirge beiimdelýine kómektesedi», - deidi ortalyq basshysy.
Ol ortalyqqa kelgen ár adammen jeke áńgimelesetinin aitty.
«Bizge ártúrli jastaǵy adamdar keledi. Ár naýqaspen jeke-jeke sóilesemin. Olarǵa úige qamalýǵa bolmaitynyn, ár sátti baǵalaý kerek ekenin aitamyn. Úide tapjylmai jatyp, saýyǵyp ketýdi armandaityndar bar. Ony armandaýdyń ornyna, áreket etý kerek ekenin aitamyn. Bizde múgedek arbasynda otyryp-aq turmysqa shyǵyp, baqytty ǵumyr keship jatqan qyzymyz bar. Eger adamnyń nieti men talpynysy bolsa, múgedek bolǵanyna qaramastan talai biikti baǵyndyryp, biznespen de ainalysyp, saiahattai da alady. Múgedekter arbasy armanǵa jetýge kedergi emes», - deidi ol.
Erlan aǵanyń aitýynsha, bul jumys ózine shabyt syilaidy.
«Men bir orynda otyra almaimyn. Únemi qozǵalysta júrip úirenip qalǵanmyn. Qazirgi jumysym kóńilimnen shyǵady. Aldyńa kelgen adamnyń densaýlyǵy jaqsaryp, nátije kórsetken kezde janym tynyshtalyp, adamdarǵa kómektese alǵanym úshin shúkir etem», - deidi ol.
