Muǵaljardyń altyn kenishindegi ereýilden soń jumysshylar jalaqysy 25 paiyzǵa kóbeietin boldy. Bul týraly AltynEx kompaniiasy habarlady, dep jazady Azattyq agenttigi.
"12 qańtar kúni jumysshylarmen kelissóz júrgizilip, jalaqylaryn qańtar aiynan bastap 25 paiyzǵa kóbeitý týraly sheshim qabyldandy. Odan bólek, kenish jumysshylarynyń eńbek jaǵdaiyn jaqsartýǵa bailanysty birneshe másele sheshimin tapty" delingen AltynEx kompaniiasynyń habarlamasynda.
Altyn óndiretin "Iýbileinoe" kenishiniń jumysshylary da taraptardyń mámilege kelgenin rastap otyr. Olardyń sózinshe, jalaqy daýyna bailanysty kelissóz eki saǵatqa sozylǵan. "Bári durys. Shahtaǵa qaita tústik" dedi aty-jónin aitqysy kelmegen jumysshylardyń biri.
- Altyndy aýylyndaǵy shahta keshki segizder shamasynda qaita jumys istei bastady. Iaǵni, kelissózden soń jumysshylar keshki aýysymǵa ketti. AltynEx kompaniiasynyń Almatydan kelgen ókili óndiris kólemi ulǵaisa, jumysshylar jalaqysy taǵy da kóbeietinin aitty. Ujym jalaqysy 25 paiyzǵa ósti, al 100 myń teńgeden az tabys tabatyn jumysshylar jalaqysyn kompaniia 30-45 paiyzǵa deiin kóbeitpek, - deidi Muǵaljar aýdany ákiminiń orynbasary Ǵalym Qobylandin.
12 qańtarda Aqtóbe oblysy Muǵaljar aýdanyndaǵy altyn óndiretin "Iýbileinoe" kenishiniń jumysshylary ereýil ótkizip, óndiristi toqtatyp tastaǵan. Kenish jumysshylary jalaqylaryn 50 paiyzǵa kóbeitýdi talap etken. Jalaqynyń azdyǵyna narazylyq bildirgenderdiń jalpy sany – júz shaqty adam.
Muǵaljardyń Altyndy aýylyndaǵy kenish qazaqstandyq AltynEx Company ieliginde. Kompaniia ken ornyna 2015 jyldan beri ielik etedi. Altyndydaǵy kenishte vahtalyq ádispen 460 adam jumys isteidi. Kásiporyn jylyna 400 myń tonna ken óndiredi.
