Rahym Oshaqbaev eldegi bilim salasyna Ulttyq qordan jyl saiyn qosymsha qarjy bólýdi usyndy, dep habarlaidy QazAqparat tilshisi.
Ulttyq qoǵamdyq senim keńesiniń qyzmetine arnalǵan dóńgelek ústel barysynda sarapshy Rahym Oshaqbaev bilim salasynyń qordalanǵan máselelerin qozǵady.
«Sóz joq, bilim berý salasyndaǵy jańartylǵan baǵdarlama men kóptegen innovatsiialar óte durys. Biraq, barlyǵy jetkiliksiz qarjylandyrýǵa kelip tireledi. Qazir pedagogtardyń jalaqysy barlyq salalardyń ishinde eń tómeni ekenin bilemiz. Muǵalimniń mártebesi men bedeline qatysty qanshama zańdar qabyldasaq ta, negizgi másele eńbekaqy bolyp qalatynyn umytpaý kerek. Qazir mektep túlekteriniń arasynda pedagogikalyq mamandyq tańdaý eń sońǵy orynda. Byltyr 8 myńnan astam grant bólinse, sonyń 4 myńnan astamyna 50-51 ball jinaǵan talapkerler ie bolǵan. Biz bolashaq balalarǵa zamanaýi qundylyqtar sińirý isin osyndai deńgeidegi talapkerlerdiń qolyna tapsyryp otyrmyz degen sóz. Bul máseleni tek eńbekaqyny kóterý arqyly ǵana retke keltirýge bolady», - degen Rahym Oshaqbaev ustazdardyń ailyǵyn ósirýge keler jyldan bastap naqty kirisýdi usyndy.
«2020-2021 jydlan bastap barlyq muǵalimderdiń eńbekaqysyn kóterý qajet dep sanaimyz. Onyń kólemi óńirdegi ortasha eńbekaqydan az bolmaýy kerek. Muǵalimdikke túsken stýdentterdiń shákirtaqysyn kóterý arqyly bul mamandyqty tańdaýǵa ekonomikalyq stimýl qalyptastyrý kerek. Prezident Qasym-Jomart Toqaev bilimge bólinetin shyǵyn kólemin jalpy ishki ónimniń 5 paiyz deńgeiine kóterý kerektigin aitty. Bizdiń oiymyzsha, bul 5 paiyzdy memleket moinyna alýy kerek. Bul rette Ulttyq qordyń qarjysyn iske qosýǵa bolady. Óitkeni Ulttyq qor – erteńgi urpaqtyń qory. Qazir qolda bar biýdjettik shyǵyndarǵa qosymsha Ulttyq qordan jyl saiyn 2 mlrd dollar qarajat bilim salasyna bólinýi kerek», - dedi Ulttyq qoǵamdyq senim keńesiniń múshesi.
